НЭМЭЛТ: 

“Парис 2024” паралимпийн наадмаас мөнгөн медаль хүртсэн Монгол Улсын Хөдөлмөрийн баатар, гавьяат тамирчин Э.Содномпилжээ дөнгөж сая баярт мөчөөсөө хуваалцлаа. Тэрбээр  “Өнөөдрийн энэ амжилтад хүргэхэд тусалсан Засгийн газрын хэрэгжүүлэгч агентлаг Биеийн тамир спортын улсын хороо, Үндэсний шигшээ багийн, холбоо, Монголын паралимпийн холбоо, Баттулга дасгалжуулагч,  Дотоод хэргийн их сургуулийн хамт олондоо маш их баярлалаа гэж хэлье.

Паралимп наадмын өмнө Үндэсний шигшээ багаас тодорхой хэмжээний зардал гаргаад Казахстанд бэлтгэл хийлгээд, баруун мөр бэртэлтэй байсан учраас Биеийн тамир спортын улсын хорооноос физик эмчилгээг хийлгэхэд тусалсанд маш их баярлалаа гэдгээ хэлье.

Өнөөдөр хангалттай туллаа, үзлээ. 260 дээр баруун мөрний бэртэл өвдсөн учраас дээшээ гарсангүй. 2028 онд АНУ-ын Лос Анжелес хотод олимп болно, түүнд бэлтгэл сургуулилалтаа хийгээд бэлтгэнэ. Энэ хугацаанд эмчилгээгээ хийлгэн, тэмцээн уралдаандаа графикийн дагуу орно. Паралимпийн холбоо, Биеийн тамир спортын улсын хоро, Дотоод хэргийн их сургуулийн хамт олон,  Монголын ард түмэндээ маш их баярлалаа гэдгээ хэлье” хэмээлээ.

Парис-2024: Э.Содномпилжээ мөнгөн медаль хүртлээ

Парис 2024 паралимпийн наадмын пара пауэрлифтингийн -107 кг жинд Монгол Улсын хөдөлмөрийн баатар, гавьяат тамирчин Э.Содномпилжээ өрсөлдөж, 248 кг өргөж мөнгөн медаль хүртлээ. Тэрбээр 243, 248 кг өргөж, мөнгөн медалийн эзэн боллоо.

Монгол Улсын хөдөлмөрийн баатар, гавьяат тамирчин Э.Содномпилжээ анх “Рио-2016” паралимпийн наадмаас хүрэл хүртсэн бол “Токио-2020” паралимпийн наадмаас алтан медаль хүртсэн. Парис-2024 түүний гурав дахь паралимпийн наадам болж, мөнгөн медаль хүртлээ. Тэрбээр мөн ДАШТ-ий гурван алт, дөрвөн мөнгө, Дэлхийн цомын зургаан алтан медальт, Азийн наадмын хоёр алт, нэг мөнгөн медальт тамирчин юм. Монгол Улсын баг энэ удаагийн паралимпийн наадмаас нэг алт, гурван мөнгө, дөрвөн шагналт байрт орсон амжилтаар өндөрлүүлж байна.