АНУ-ын рок хамтлаг “Linkin Park” шинэ гоцлол дуучинтай болсноо мэдэгдэв. Түүнийг Эмили Армстронг гэх бөгөөд тус хамтлагийн долоон жилийн дараа гарч буй цомгийн дуунуудыг дуулжээ. Гоцлол дуучин асан Честер Беннингтон 2017 онд амиа хорлосноос хойш хамтлаг уран бүтээл хийгээгүй юм. Армстронг хамлагийн гишүүд болох Майк Шинода, Брэд Дэлсон, Финикс, Жо Хан нартай нэгдэж, удахгүй хэрэгжүүлэх төслүүдэд оролцох болно. Эргэн ирсэн хамтлагийн анхны цомог энэ оны арваннэгдүгээр сарын 15-нд “From Zero” нэртэйгээр гарах бөгөөд эхний сингл "The Emptiness Machine" гэх дууг Армстронг дуулжээ. Мөн ирэх 2025 онд “Linkin Park” томоохон хэмжээний аялан тоглолт хийхээр төлөвлөж байна.

Армстронг Лос Анжелес хотод өссөн бөгөөд 2005 онд гитарчин Сиуксси Медлитэй хамтран “Dead Sara” альт-рок хамтлагийг байгуулсан гэдгээр алдартай. Тэрбээр “Billboard”-д өгсөн ярилцлагадаа “Linkin Park”-ын 2000 онд гаргасан “Hybrid Theory” цомог түүнд хэрхэн нөлөөлснийг дурсав.
"Хамтлаг гарч ирэхэд би өөр хамтлагт байсан. One Step Closer нь миний хувьд чухал дуу байсан бөгөөд би яг л хийх ёстой зүйлээ олсон мэт болсон. Тэр цомог бол бүх зүйл байсан. Би хэдэн триллион удаа сонссон” гэж Армстронг ярьжээ. Соло уран бүтээлчид давамгайлсан эрин үед “Linkin Parк”  бол хамгийн амжилттай хамтлагуудын нэг юм. Тэд “Spotify”-ын бүх цаг үеийн хамгийн их цацагдсан шилдэг 10 цомгийн жагсаалтад багтсан цорын ганц хамтлаг бөгөөд “Papercuts” дууны цуглуулга нь өдөрт 9 сая гаруй хандалт авдаг.

Эх сурвалж: BBC