"SpaceX" компанийн үүсгэн байгуулагч Элон Маскийн санаачилсан засгийн газрын бүтээмжийг шалгах хороо байгуулах саналыг Дональд Трамп дэмжжээ. Ерөнхийлөгч асан Трамп ирэх арваннэгдүгээр сард сонгуульд ялж, АНУ-ын тэргүүнээр сонгогдвол засгийн газрын үйл ажиллагаанд аудит оруулж, бүтээмжийг шалгах хороо байгуулж, Элон Маскаар удирдуулна гэдгээ Пүрэв гаригт мэдэгджээ.

Дональд Трамп хэлэхдээ, хуучин байсан болон одоогийн засгийн газар их хэмжээний татвар төлөгчдийн мөнгийг үр ашиггүй зүйлсэд зарцуулж, хулгайлж байгаа тул үр бүтээмжийн хороо байгуулах нь шинэчлэлийг авчирна гэжээ.

Тэрбээр Нью-Йоркийн Эдийн засгийн клубт илтгэл тавихдаа энэ талаар илүү дэлгэрэнгүй тайлбарласан ба  эрчим хүчний үйлдвэрлэлийг нэмэгдүүлэх, крипто валютыг хүлээн зөвшөөрөх, засгийн газрын зардлыг эрс танах, компаниудын аж ахуйн нэгжийн татварыг бууруулах саналуудыг танилцуулжээ.

Элон Маск ерөнхийлөгч асан Дональд Трампийн саналыг сайшааж "Би АНУ-ын төлөө зүтгэхэд бэлэн байна. Надад хэргэм зэрэг, цалин, бусдад магтуулах гээд аль нь ч хэрэггүй" гэсэн байна. Трамп мөн түүнийг "Чи бол хамгийн сайн танагч. Надад Элон Маск хэрэгтэй. Надад маш хүчтэй, зоригтой, ухаалаг хүн хэрэгтэй байна" гэжээ.

Эх сурвалж: ASSOCIATED PRESS