Цахим спортын "CS2" төрлийн томоохон тэмцээнүүдийн нэг болох "ESL Pro League"-ийн 20 дахь улирал Мальта улсад эхэлсэн. Нийт 750 мянган ам.долларын шагналын сантай тус тэмцээнд тив, бүс нутаг бүрийн шилдэг 32 баг өрсөлдөж байна. Ази тивээ төлөөлөн Монголын "The MongolZ" болон "ATOX Esports" багууд оролцож буй.

Өчигдөр/2024.09.05/ тэмцээний гурав дахь өдөр "The MongolZ" баг хоёр дахь тоглолтоо хийлээ. Тэд хоёр дахь өдөр Францын "3DMAX" багт 0-2 гэсэн харьцаатай хожигдож, доод бүс рүү унасан. Тэгвэл өчигдөр Испанийн "KOI" багийг илт илүүрхэж, 2-0 гэсэн харьцаатай хожив. Хоёр тоглолтын нийлбэр дүн 26-1 гэхээр бут ниргэсэн үзүүлэлт. "The MongolZ" өнөөдөр 19.30 цагаас дэлхийн шилдэг Оросын "Spirit" багийн эсрэг тоглоно. Өчигдөр "Spirit" баг Бразилын "MIBR" багт хожигдож, шуугиан тарьсан. "donk" гайхалтай тоглолтоо үзүүлсэн ч багийнхан нь түүнд тус болж чадсангүй.

Хоёр баг өмнө нь учраа таарахад "The MongolZ" 2-0 гэсэн харьцаатай хожиж байв. Тэгвэл өнөөдөр тоглолтын үр дүн хэрхэх вэ?

Нөгөө талд нэгэн сайн мэдээ байгаа нь Монголын "ATOX Esports" багийн Европыг зорих виз гарчээ. Тэдний виз гарах эсэх нь эргэлзээтэй болж, тоглолтын өдөр ойртоод байсан юм. Тэд эхлээд дэлхийн шилдэг, Францын алдарт "Vitality" багтай учраа таарсан.