ОХУ-ын ерөнхийлөгч Путин Монгол дахь айлчлалаасаа залгуулаад зүүн хязгаарын Владивосток хотод эдийн засгийн форумд оролцож буй.

Тэрбээр энэ форумын үеэр Оросоос газар нутгаа эргүүлэн авах Украины оролдлого бүтэлгүйтсэн гэж мэдэгджээ. “Курскийн хилийн бүс нутгаас дайсныг хөөж, иргэдээ хамгаалахын тулд бүх зүйлийг хийх нь Оросын армийн ариун үүрэг. Мөн Оросын цэргүүдийн хэдэн сарын турш урагшилж буй Украины зүүн үйлдвэрлэлийн гол нутаг Донбассыг эзлэх нь Москвагийн гол зорилго хэвээрээ. Курскийн ажиллагааны гол зорилго нь Оросыг сандаргаж, бухимдуулах явдал байсан. Тэд амжилтад хүрсэн үү? Үгүй. Тэд бүтэлгүйтсэн” гэж Путин хэлжээ.

Мөн удахгүй болох АНУ-ын ерөнхийлөгчийн сонгуульд Камала Харрисыг дэмжинэ гэж хошигножээ.

Түүнээс АНУ-ын сонгуулийн талаар асуухад “Эцсийн дүндээ энэ бол Америкийн ард түмний сонголт. Бид одоогийн ерөнхийлөгч Байденд дуртай байлаа. Тэр өрсөлдөөнөөс хасагдсан ч бүх дэмжигчиддээ Камала Харрисыг дэмжихийг зөвлөсөн. Тиймээс бид ч хэлснээр нь хийх болно. Хоёрдугаарт, Харрис үнэхээр хурц тод, халдвартай инээдэг. Тэгэхээр тэр сайн байгаа гэсэн үг. Урьд өмнө нь ямар ч ерөнхийлөгчийн авч байгаагүй хориг арга хэмжээнүүдийг Трамп Оросын эсрэг хэрэгжүүлсэн. Хатагтай Харрис ийм зүйлээс татгалзах байх” гэж хэлжээ.

Түүний хошигносон хариултыг Цагаан ордон ч, Камала Харрис ч авч хэрэгсэхгүй байх магадлалтай. Кремль ерөнхийлөгч асан Дональд Трампийг дэмждэг гэж олон нийт үздэг.

Эх сурвалж: NBC NEWS