Өвөлжилтийн бэлтгэл ажлыг хангах ажлын хүрээнд, цахилгаан эрчим хүчний дутагдлаас урьдчилан сэргийлэх зорилгоор Багануур дүүрэгт эрчим хүч хуримтлуурын станц барихаар болсон. Тус станцыг барих гүйцэтгэгчийг шалгаруулах Олон улсын нээлттэй тендер сонгон шалгаруулалтын ажлыг 2024 оны зургадугаар сард зарласан билээ. Уг олон улсын тендерт БНХАУ-ын “Энвижн Энержи” компани шалгарсан юм. Тэгвэл өнөөдөр /2024.09.06/ талууд батерей хураагуурын станц барих гэрээнд гарын үсэг зурав.

Нийслэлийн Засаг дарга Х.Нямбаатар: 

-Өнгөрсөн өвөл 200мВт эрчим хүчний хомсдолтой өвөлжсөн. Энэ жил нийслэл анх удаа дотоод бонд гаргасан. Үүний 600 орчим тэрбум төгрөгөөр эрчим хүчний төсөл хөтөлбөрийг санхүүжүүлэхээр төлөвлөсөн. Уг мөнгөөр өнгөрсөн жил дутагдаж байсан 200 орчим мВт-ийг нөхөх хөрөнгө оруулалтыг хийж байна. Аравдугаар сарын 5-ны өдөр Бөөрөлжүүтийн цахилгаан станцын эхний 150 мВт нээх үйлдвэрлэлийг эхлүүлнэ. Багануур дүүрэгт 300 орчим тэрбум төгрөгөөр Эрчим хүч хуримтлуурын 50мВт-ийн батерей станц барихаар болж тендер зарласан байсан. Тендерт БНХАУ-ын “Энвижн Энержин” гэх салбартаа тэргүүлсэн компани шалгарсан. Өнөөдөр шалгарсан компанитай ажил гүйцэтгэх гэрээ байгуулж байна.

Энэ оны арваннэгдүгээр сарын 30-н гэхэд тус станцыг барьж төвийн эрчим хүчний системд холбож нийслэлд хүлээлгэж өгнө. Батерей станцын давуу тал нь оргил ачааллын үед системд эрчим хүч нийлүүлээд, оргил ачаалал буурахаар системээс гардаг өөрийгөө цэнэглэдэг гэв.

Дашрамд дурдахад, тус батерей хураагуурын станц нь төвийн бүсийн эрчим хүчний системийн давтамж тохируулга хийх, өвлийн оргил ачаалал хөнгөвчлөх буюу системийн үйл ажиллагаанд гарах хүчин чадлын дутагдлыг байгаль орчинд ээлтэй сэргээгдэх эрчим хүчний эх үүсвэрээс хангаж, хүлэмжийн хийг бууруулах зэрэг дувуу талтай ажээ.