Хүний эрхийн үндэсний комиссоос долоо хоног бүрийн Пүрэв гаригт мэдээлэл хийдэг. Энэ удаа цэргийн алба хаагчдын эрхтэй холбоотой асуудлыг хөндлөө. 

Хэвлэлийн хурлын эхэнд хүний эрхийг хүндэтгэх, хөхиүлэн дэмжих, хангаж, хамгаалах нь Төрийн үндсэн үүрэг. Монгол Улсын Хүний эрхийн Үндэсний Комисс нь төр энэхүү үүргээ хэрэгжүүлж байгаа эсэхэд хөндлөнгөөс хяналт тавьдаг хараат бус, хөндлөнгийн байгууллага гэдгийг онцоллоо.

ХЭҮК-ын Гомдол, хяналт шалгалтын хэлтсийн дарга Г.УУГАНБААТАР:

-Сүхбаатар аймгийн Эрдэнэцагаан сумын нутагт байрлах Хилийн цэргийн 0146 дугаар ангийн хугацаат цэргийн алба хаагчид дэглүүлсний улмаас эрүүл мэндэд нь хохирол учирч, эмнэлгийн тусламж үйлчилгээ авч байна гэх мэдээлэл ХЭҮК-д ирсэн.

Мэдээллийн дагуу нэн даруй Хил хамгаалах ерөнхий газрын дарга, хилийн цэргийн командлагч болон ХХЕГ-ын Эрүүл мэндийн албаны дарга, Төрийн тусгай албан хаагчдын нэгдсэн эмнэлгийн холбогдох албан тушаалтнуудаас мэдээлэл, тайлбар авсан.

Үүссэн нөхцөл байдалтай холбогдуулан Төрийн тусгай албан хаагчдын нэгдсэн эмнэлэгт очиж, ажилласан бөгөөд ХХЕГ-ын холбогдох тайлбар мэдээлэл, баримтыг гаргуулахаар өнөөдөр албан бичиг хүргүүлж байна.

Хоёр цэргийн эрүүл мэндийн асуудал нууцлалтай учраас өвчний оношийг хэлэх боломжгүй. Гэхдээ эрүүл мэнд, биеийн байдал хэвийн, өчигдөр шинжилгээнд хамрагдсан. Тэд зохих эмчилгээ, сувилгааг хийлгэж байна.

Бид бөчигдөр холбогдох цэргүүдтэй уулзсан, мэдээллийг авсан. ХЭҮК нь цэргийн дүрмийн бус харилцаатай холбоотой асуудалд хяналт, шалгалт судалгааны ажлуудыг тогтмол зохион байгуулж ирсэн. Өнгөрсөн 2023 онд өргөн барьсан комиссын 21 дэх илтгэлд цэргийн дүрмийн бус харилцааны асуудлыг судалж, хяналт шалгалт хийж, илтгэлдээ тусган УИХ-аар хэлэлцүүлсэн. ХЭҮК 2006 онд цэргийн дүрмийн бус харилцаатай холбоотой асуудлаар судалгаа хийснээр “Цэргийн дүрмийн бус харилцаа байна. Үүнийг таслан зогсоогоорой" хэмээн илтгэлдээ тусгаж, УИХ-аар хэлэлцүүлж байсан.

2006 оноос цэргийн дүрмийн бус харилцаа 11-20 хувиар буурсан боловч бүрэн таслан зогссонгүй гэж дүгнээд УИХ-д оруулсан илтгэлдээ тусгасан байдаг.

Энэхүү илтгэлийг УИХ-аас хэлэлцээд 2022 оны 49 дүгээр тогтоолыг гаргасан. Өөрөөр хэлбэл цэргийн албан дахь дүрмийн бус харилцааны шалтгаан нөхцөлийг тогтоох, таслан зогсоох арга хэмжээг авч, хяналт тавих үүргийг Засгийн газарт оногдуулсан.

ХЭҮК нь цэргийн анги байгууллагад хяналт шалгалтын ажлыг тогтмол зохион байгуулж байна. Тухайлбал, 

• Хилийн цэргийн анги байгууллагад 53 удаа
• Зэвсэгт хүчний анги байгууллагад 69 удаа
• Дотоодын цэргийн анги байгууллагад 10 удаа цэргийн дүрмийн бус харилцааны шалтгаан нөхцөлийг арилгуулахаар, дүрмийн бус харьцаатай холбоотой асуудлаар хяналт, шалгалтын ажлыг зохион байгуулж байна.