Цахим спортын "CS2" төрлийн томоохон тэмцээнүүдийн нэг болох "ESL Pro League"-ийн 20 дахь улирал Мальта улсад эхэллээ. Нийт 750 мянган ам.долларын шагналын сантай тус тэмцээнд тив, бүс нутаг бүрийн шилдэг 32 баг өрсөлдөж байна. Ази тивээ төлөөлөн Монголын "The MongolZ" болон "ATOX Esports" багууд оролцож буй.

Өчигдөр/2024.09.04/ тэмцээний хоёр дахь өдөр "The MongolZ" баг эхний тоглолтоо хийлээ. Тэдний эхний өрсөлдөгч нь Францын "3DMAX" байсан. Хоёр баг өмнө нь Энэтхэгт болсон "Skyesports Championship"-ийн аваргын төлөө учраа таарахад Францын баг илүүрхэж байсан бол энэ удаад ч ялгаа гарсангүй. "3DMAX" баг 2-0 гэсэн харьцаатай ялалт байгуулжээ.

Өнөөдөр "The MongolZ" баг 19.30 цагаас Испанийн "KOI" багтай тоглоно. Ялсан нь тэмцээнээ үргэлжлүүлэх бол ялагдсан нь хасагдахад тун ойртох юм.

Ирэх долоо хоногт "ATOX"-ийн тоглолтууд эхэлнэ. Тэд эхлээд Францын алдарт "Vitality" багтай учраа таарсан. Гэхдээ асуудал гарчээ. Тодруулбал, "ATOX"-ийн Европыг зорих виз хараахан гарч амжаагүй байна. Тэд визэндээ эрт орсон боловч саяхан Мэйжорын эрхийн төлөөх тэмцээнд сайн амжилт үзүүлэхийн тулд Хятадыг зорихоор болж, гадаад паспортуудаа авсан аж. Одоо харин дахин визэнд орсон гэнэ. Гэхдээ л цаг давчуу үед виз нь есдүгээр сарын 11-нээс өмнө гарах эсэх нь эргэлзээтэй болжээ.