Мэтт Статцманаас өмнө гаргүй тамирчин пара байт харвааны төрөлд өрсөлдөнө гэдэг боломжгүй мэт санагдаж байв. Гэвч америк эр энэ спортын төрөлд хувьсгал хийж, нумаа хөлөөрөө барьж, сумаа эрүүгээрээ тавьж сурчээ. Хамгийн гайхалтай нь тэрбээр пара байт харвааны рекорд оноо болох 149 оноог авч, Парисын паралимпийн аваргаар тодорсон гэнэ. Түүний хувьд паралимпийн аварга болохын тулд 12 жил зүтгэж, эцэст нь зорьсондоо хүрсэн нь энэ аж.

Лондонгийн паралимпоос мөнгөн медаль хүртэж байсан Мэтт Статцман наадам эхлэхийн өмнө "Над шиг гаргүй харваачдаас хэн нэгэн нь алтан медаль хүртвэл надад миний медаль юм шиг л санагдана. Хэн гэдэг нь хамаагүй. Би бусдадаа бүх нууцаа хэлдэг. Энэ л энэ спортын хөгжлийн төлөө хийж буй миний хувь нэмэр" гэж байжээ.

Статцман төрөлхийн гаргүй бөгөөд түүнийг дөрвөн сартай байхад нь Айовад аж төрч, ан хийдэг гэр бүл өргөн авчээ. Тэрбээр 16 насандаа аавынхаа тусламжтай анхны сумаа тавьж байсан гэв. Анхны нумаа хулгайд алдсаныхаа дараа бараг арав гаруй жил дахин нум аваагүй гэнэ. Өдгөө 41 настай Статцман энэ жил сүүлийн паралимпдоо оролцсон гэдгээ мэдэгдэв. Учир нь түүний ташаа өвдөлт ихээр мэдэрч эхэлжээ. Энэ талаараа тэрбээр "13 гаруй жил би өдөр бүр харваж, бэлтгэлээ хийдэг байлаа. Эмч нарын хэлснээр миний ташаа одоо элэгдэж байна гэсэн" гэлээ.

Түүний адилаар 17 настай Деви гэх энэтхэг охин паралимпод өрсөлдөж, холимог хосын төрөлд хүрэл медаль хүртжээ. Түүний хувьд паралимпийн түүхэнд медаль хүртсэн анхны гаргүй эмэгтэй харваач болсон аж. Деви ч мөн ховор тохиолдлын төрөлхийн гаргүй.