Миллениал үеийнхэн буюу 1981-1996 онд төрсөн хүмүүс кофенд хамгийн их мөнгө зарлагаддаг болохыг судалгаагаар тогтоожээ. Тодруулбал, 28-43 насныхан өнгөрсөн нэг жилийн хугацаанд кофенд дунджаар 728 фунт стерлинг буюу 957 ам.доллар зарцуулсан байна. Харин "Z" үеийнхэн кофенд жилдээ 676 фунт стерлинг зарцуулдаг. Эсрэгээрээ "Baby boomers" буюу 1946-1964 онд төрсөн хүмүүс кофенд ердөө 260 фунт стерлинг зарцуулж байна.

Хэт их биш, хэт бага биш, дундаж хэмжээнд кофе уудаг хүн амьдралынхаа туршид 29 мянган фунт стерлинг зарлагаддаг болохыг "McDonald’s"-ын захиалгат судалгаагаар тогтоожээ. Энэ нь бараг 2000 литр кофе болно.

Британичуудын 27 хувь нь кофенд маш их мөнгө зарцуулдаг болохыг өөр нэг судалгаагаар тогтоожээ. Хамгийн сонирхолтой нь оффис дээрээ үнэгүй кофе уухаас маш олон хүн татгалздаг аж. Ажил дээр нь үнэгүй кофе байдаг хүмүүсийн 37 хувь нь гарч кофе уухыг илүүд үздэг гэж хариулжээ. Мөн кофечдын 49 хувь нь өглөө эхний аяга кофегоо уух хүртлээ өөрийгөө "үхдэл" мэт мэдэрдэг гэжээ.

Харин кофены төрлийн хувьд хамгийн алдартай нь латте байна. Судалгаанд оролцогчдын 23 хувь нь латте, 21 хувь нь капучинод дуртай гэжээ. Мөн 74 хувь нь сүүтэй кофе, 18 хувь нь хар кофег илүүд үздэг гэжээ. Судалгаанд оролцогсдын бараг тавны хоёр нь өөрсдийгөө кофенд дурлагч гэсэн бол есөн хувь нь кафейнд донтсон гэжээ. Түүнчлэн зардал ихтэй ч гэлээ кофегүйгээр амьдрахыг хүсдэггүй гэж тэдний 56 хувь нь хариулсан байна.

Эх сурвалж: THE TELEGRAPH