Украины олон улсын тавцан дахь хамгийн нэр хүндтэй хүмүүсийн нэг бол Гадаад хэргийн сайд Дмитрий Кулеба. Тэгвэл Дмитрий Кулеба Лхагва гаригт албан тушаалаасаа огцорч буйгаа мэдэгдэв. 43 настай Кулеба огцрох шалтгаанаа тодорхой хэлээгүй аж.

Дмитрий Кулеба 2020 оны гуравдугаар сараас хойш Гадаад хэргийн сайдаар ажиллажээ. Украинчуудын үзэл санааг дэлхий нийтэд дамжуулсан, гадаадын нэр хүндтэй хүмүүстэй уулзсан зэргээр дамжуулаад Дмитрий Кулеба дайны үед нэр хүнд сайтай болсон. Түүнийг Зеленскийн дараа орох хоёр дахь нэр хүндтэй хүн ч гэдэг. Тэрбээр өнгөрсөн долдугаар сард Хятадад айлчилснаар дайн эхэлснээс хойш тус улсыг зорьсон хамгийн өндөр албан тушаалтан болжээ.

Түүний албан тушаалыг залгамжлах хүнийг өнөөдөр зарлах төлөвтэй байна. Нэрээ нууцалсан эх сурвалжуудын мэдээлснээр Кулебагийн орлогч Андрей Сыбихаг эл албан тушаалд томилж магадгүй. Шинэ Гадаад хэргийн сайд ирэх долоо хоногт Нью-Йоркт болох НҮБ-ын Ерөнхий Ассамблейн чуулганд Зеленскийг дагалдан явах магадлалтай аж.

Украины засгийн газрын өөр дөрвөн сайд Мягмар гаригийн орой огцрох өргөдлөө өгсөн. Ингэснээр Украины засгийн газрын бүтцэд дайн эхэлснээс хойших хамгийн том өөрчлөлт орох болоод байна. Ерөнхийлөгч Зеленский өнгөрсөн долоо хоногт дайн 1000 дахь өдөртөө ойртож буйг онцлоод, албан тушаалын өөрчлөлтүүд ч хийгдэх цаг айсуйг сануулсан. Гэхдээ засгийн газарт ажиллах урилгыг нь хүлээж авах эсэхийг мэдэхгүй байгаа тул шинэ томилгоог хараахан зарлаж чадахгүй байгаа гэжээ. Парламент дахь Зеленскийн намын дарга Давид Арахамиягийн мэдэгдсэнээр одоогийн засгийн газрын талаас илүү хувь нь өөрчлөгдөнө.

Эх сурвалж: AP