Цэнхэр гаригийн шилдэг хөлбөмбөгчинд олгодог Баллон д’Ор буюу Алтан бөмбөг шагналын энэ жилийн нэр дэвшигчдийг танилцууллаа. Харамсалтай нь Месси болон Роналдогийн нэр байсангүй. Ийнхүү 2003 оноос хойш анх удаагаа Месси, Роналдо хоёргүй Баллон д’Ор шагнал гардуулах ёслол болох аж.

Месси алтан бөмбөгийг найман удаа, Роналдо таван удаа хүртэж түүхэн амжилт үзүүлсэн билээ.

Энэ жилийн алтан бөмбөгийн эзэн аравдугаар сарын 28-нд тодрох бөгөөд Винисиус Жуниор, Родри, Жюд Беллинхем, Килиан Мбаппе, Эрлин Холанд, Харри Кэйн тэргүүтэй 30 тамирчин өрсөлдөнө.

Өдгөө Америкт Интер Майамид тоглож буй Месси өнгөрсөн жил найм дахь алтан бөмбөгөө хүртэж, мөнхийн өрсөлдөгч Роналдог шагналын тоогоороо хол орхисон. Аргентин эр 2009 онд анх удаагаа дэлхийн шилдгээр тодорч, бүр дөрөв дараалан тус шагналын эзэн болж байсан билээ. Түүний хувьд 2006 онд анх удаагаа энэ шагналд нэр дэвшиж байв.

Харин Роналдо анх 2004 онд алтан бөмбөгт нэр дэвшиж, 2008 онд анхны шагналаа авч байлаа. Роналдо, Мессигийн замналын ид үед алтан бөмбөг зөвхөн хоёр хүний л шагнал байсан түүхтэй. Гуравдагч хүн гэж байхгүй тэд хамтдаа 13 жил нэгнийхээ дээр доор орсон.