Венесуэлийн ерөнхийлөгч Николас Мадуро маргаантай ерөнхийлөгчийн сонгуулийн дараа улс оронд баяр баясгалан авчрахыг хичээж, зул сарын баярыг урагшлуулахаар шийджээ. Тодруулбал, тэрбээр Даваа гаригт телевизийн нэвтрүүлэгт оролцохдоо "Та бүхнийг хүндэтгэн, талархал илэрхийлээд, зул сарын баярыг аравдугаар сарын 1-нд болгож наашлуулахаар зарлиг гаргах гэж байна" гэсэн юм.

Долдугаар сарын 28-нд болсон сонгуулийн үр дүн сөрөг хүчин болон олон улсын хамтын нийгэмлэгийн эсэргүүцлийг дагуулсан ч 61 настай Мадуро гурав дахь удаагаа сонгогдох болсон. Ингэснээр түүний бүрэн эрхийн хугацаа дахин зургаан жил үргэлжлэх болж байна.

Зул сарын баярыг ийнхүү наашлуулж буй нь сонгуулийн үр дүнд бухимдсан олны анхаарлыг сарниулах оролдлого гэж үзэж байна. АНУ болон Латин Америкийн хэд хэдэн орон Венесуэлийн сөрөг хүчнийхний ялалтыг дэмжиж байгаа бол Мексик, Колумб, Бразил зэрэг улс санал хураалтын нарийвчилсан тооллогыг харалгүйгээр албан ёсны дүнг хүлээн зөвшөөрөхөөс татгалзаж байна. Хакерууд санал хураалтад нөлөөлсөн гэж сонгуулийн агентлагууд мэдээлсэн ч ажиглагчид үүнийг нотлох баримт байхгүй гэж үзжээ. Тэр бүү хэл сөрөг хүчний нэр дэвшигч Эдмундо Гонзалес Уррутиаг сонгуулийн санал хураалтад ялсан гэж зүтгэснийх нь төлөө прокурорууд баривчлах тушаал гаргажээ.

Мадуро ялалт байгуулсныг зарласны дараа тус улсад эсэргүүцлийн жагсаал болж, 25 энгийн иргэн, хоёр цэрэг амиа алдсан бөгөөд 2400 гаруй хүн шоронд хоригджээ.

Эх сурвалж: JAPAN TODAY