АНУ-ын дэд ерөнхийлөгч Камала Харрис Цагаан ордны төлөөх өрсөлдөөнийхөө хүрээнд ард иргэдийнхээ санхүүгийн дарамтыг багасгаж, бизнесүүдэд дэмжлэг үзүүлэх үүднээс шинээр байгуулагдаж буй жижиг, дунд бизнесүүдэд 50 мянган ам.долларын хөнгөлөлт үзүүлэх амлалт өгөв. Тэрбээр Лхагва гаригт Нью Хэмпширт төлөвлөгөөгөө зарлаж, ерөнхийлөгчөөр сонгогдсон дөрвөн жилдээ хэрхэн 25 мянган жижиг бизнесийг дэмжихээ тайлбарлана.

Одоогийн татварын журмын дагуу жижиг бизнес эрхлэгчид үйл ажиллагааныхаа эхний жилтэй холбоотой зардлаа 5000 ам.доллар хүртэл нэхэмжилж болно.

Харрис өнгөрсөн долоо хоногт Жоржиа мужийн Саванна хотод болсон кампанит ажлынхаа үеэр төлөвлөгөөгөө танилцуулж, жижиг бизнесийг хөгжүүлэх нь түүний "онцгой зорилтуудын" нэг гэж мэдэгджээ. Тэрбээр "Америкийн хөдөлмөр эрхэлж буй хүн амын тал хувь нь жижиг бизнес эрхэлдэг,эзэмшдэг эсвэл ажилладаг" гэж хэлсэн ба Дональд Трампийг эдийн засгийн бодлогогүй алхам хийдэг гэж шүүмжилжээ.

Ерөнхийлөгч Жо Байден өнгөрсөн долдугаар сард сонгуулиас нэрээ татаж, Камала Харрисыг санал болгосон байдаг. Харрис Мягмар гаригт Пенсильвани мужийн Филадельфи хотод болох ерөнхийлөгчийн сонгуулийн анхны мэтгэлцээнд Трамптай мэтгэлцэхээр бэлтгэж байна. Тэрбээр өнгөрсөн сард хийсэн эдийн засгийн бодлогынхоо анхны мэдэгдэлдээ орон сууц худалдан авч буй хүмүүст 25 мянган ам.долларын хөнгөлөлт, нярай хүүхэдтэй бол 6000 ам.долларын татварын хөнгөлөлт үзүүлэх, холбооны үнийг хориглох зэрэг "боломжийн эдийн засгийг бий болгох" саналуудыг тавьсан юм.

Эх сурвалж: ALJAZEERA