Израилийн хүчин Мягмар гаригт Газын зурваст цохилт өгснөөр дор хаяж 35 палестин хүн амиа алджээ. Энэ үеэр полиогийн вакцинжуулалт тасалдалгүй үргэлжилж, 10-аас доош насны хүүхдүүдийн дөрөвний нэгт вакцин тарьсан байна. Мягмар гариг нь бүх нийтийн полио вакцинжуулалтын гурав дахь өдөр байсан.

Газын зурваст өнгөрсөн сард нярай хүүхдэд полиомиелит өвчний анхны тохиолдол илэрсэнтэй холбоотойгоор яаралтай кампанит ажил зохион байгуулсан билээ. Энэ хүрээнд Газын зурваст өдөрт найман цагийн завсарлага авахаар тохирсон. Нийт 640 мянга орчим хүүхдийг вакцинжуулахаар төлөвлөжээ. Эхний хоёр өдөр төвийн бүсийн 10-аас доош насны 161 мянга гаруй хүүхдийг вакцинд хамруулсан.

НҮБ-ын ерөнхий нарийн бичгийн дарга Антонио Гутерриш "Вакцинжуулалтын төлөө тэмцэл түр зогсож буй нь аймшиг дундах найдвар, хүн төрөлхтөнд тохиох ховорхон гэрэл гэгээ" гэж мэдэгджээ. Харин НҮБ-ын хэвлэлийн төлөөлөгч Стефан Дужаррик хэлэхдээ "Талууд хүүхдүүдийг үхлийн аюултай вирусээс хамгаалахын тулд ажиллаж чадвал цаашид бүх гэм зэмгүй хүнийг дайнаас хамгаалахын тулд ажиллаж чадна гэсэн үг" гэв.

Гэхдээ Газын өмнөд хэсгийн зарим хүүхэд түр гал зогсоохоор тохирсон бүсээс гадуур байгаа тул тэднийг ялгалгүй вакцинжуулахаар хэлэлцээ үргэлжилж байна.

Эх сурвалж: JAPAN TODAY