Өмнөд Африкийн ерөнхийлөгч асан Жейков Зумагийн охин Эставани улсын хааны 16 дахь эхнэр болжээ. Гэрлэх ёслол Даваа гаригт болсон бөгөөд 21 настай сүйт бүсгүй Зума олон зуун эмэгтэйчүүдийн хамт Эставани улсын уламжлалт бүжгийг бүжиглэж, эхнэр болсноо баталсан байна. Тус улсын хаан III Мсвати нь 1986 онд засгийн эрхэнд гарсан ба өдгөө 56 настай, олон арван хүүхэдтэй. Эставани нь ядуу буурай улс орон ч гэлээ сүүлчийн эзэн хааны хувьд Мсвати баян, тансаг амьдардаг.

Өмнө нь Мсвати хаан 2005 оны есдүгээр сард 17 настай Финдил Нкамбулег 13 дэх эхнэрээ болгон авсан байдаг. Мөн 2001 онд өөр нэгэн 17 настай охиныг ес дэх эхнэрээ болгожээ. Гэхдээ Мсвати эмэгтэй хүн 18 нас хүртлээ бэлгийн харилцаанд орохыг хориглосон хууль гаргасан байдаг бөгөөд өөрийнхөө гаргасан хууль дүрмийг зөрчсөн тул өөрийгөө нэг үхрээр торгож байжээ.

Эставани нь 1.2 сая хүнтэй бөгөөд хааны зарлигаар удирддаг. Энэ нь тус улсад нам эвсэл байдаггүй, зөвхөн сонгогдсон хүмүүс хааны зөвлөхийн үүрэг гүйцэтгэдэг гэсэн үг. Мсвати 10 дахь эхнэр болох 18 настай Зена Махлагугээ төгсөх шалгалтад бэлдэж байхад нь хулгайлж, хүчээр эхнэрээ болгож байжээ. Зенагийн ээж тухайн үед охиноо эргүүлэн аврахын тулд хуулийн дагуу маргаж байсан ч эцэст нь өөрөө буруутан болсон байна.

Хааны шинэ хадам ерөнхийлөгч асан Жейкоб Зумагийн хувьд өдгөө 82 настай ба зургаан удаа гэрлэж байсан ч одоо дөрвөн эхнэр, 20 гаруй хүүхэдтэй. Тэрбээр 2009-2018 онд Өмнөд Африкийн ерөнхийлөгчөөр ажиллаж байсан ч авлигын хэргээр хэд хэдэн удаа Африкийн үндэсний конгресс намаасаа огцорсон.

Эх сурвалж: GUARDIAN