Сүхбаатар аймгийн Эрдэнэцагаан сумын 0146 дугаар хилийн цэргийн ангид дэглүүлсэн гэх хоёр алба хаагчийн биеийн байдал маш хүнд, эмнэлэгт хэвтэн эмчлүүлж байна гэх мэдээлэл олон нийтийн сүлжээнд цацагдсан. Энэ талаар цагдаагийн байгууллагаас тодруулахад “Цахим орчинд нийтлэгдсэн мэдээллийн дагуу орон нутгийн цагдаагийн газраас шалгалтын ажиллагааг явуулж байна гэв.

Тодруулбал, цэргийн хоёр алба хаагч төмсгөндөө хүнд гэмтэл авч, Цэргийн төв эмнэлэгт өнөөдөр хагалгаанд орох гэж байгааг ар гэрийнхэн нь хэлсэн юм.

ЦЕГ: ЦЭРГИЙН АНГИД ДЭГЛҮҮЛСЭН ГЭХ ХЭРГИЙГ ШАЛГАЖ БАЙНА

Цэргийн алба хаагчийн биеийн байдлыг тодруулахаар ар гэрийнхэнтэй нь холбогдлоо. Цэргийн алба хаагчийн ээж "Цэргийн албанд хүү маань 2024 оны тавдугаар сард татагдан явсан. Одоо 18 настай. Эрүүл мэндийн үзлэгээр бүрэн тэнцэж, цэргийн алба хаахаар баяртайгаар явсан. Гэтэл хүү маань хот явж, хагалгаанд орохоор болсон гэдгийг хүнээс дам сонсч мэдлээ. Хүүгээ гэмтэж, хилээс анги руу явж байгаагаа мэдсэн. Цэргийн ангиас энэ талаар ар гэрийнхэнд нь албан ёсны тайлбар мэдэгдээгүй. Хүүгээ эмнэлэгт хэвтсэн сураг дууллаа гэхээр цэргийн ангиас нь "Хэн ямар худал мэдээлэл тараасан бэ. Тэр хүнийхээ нэр ус, утсыг өг" гэж ярьсан байсан. Тэрнээс биш "Хүүг эмнэлэгт үзүүлэхээр авч явж байна" гэж хүүхдийн эрүүл мэндийн талаар яриагүй. Эхний мэдээллээр хот явах гэж байгаа юм байна гэж сураг сонссон чинь хоёр гурав хоногийн дараа "Хүү чинь зүгээрээ. Анги руу нь хүргэж өгөх гэж байна" гэсэн. Тэгснээ гэнэт хот руу хагалгаанд орно гэж хариу өгсөн.

Хүүтэйгээ утсаар холбогдсон. Өнөөдөр хүү маань Цэргийн төв эмнэлэгт хагалгаанд орох гэж байгаа учраас утсаар холбогдож чадаагүй байна.

Цэргийн дэглэлтийн талаар олон удаа ярьж ирсэн. Хэвлэл мэдээллээр ч олон удаа мэдээллэдэг шүү дээ. Эмнэлэгт хэвтэх нь битгий хэл ээж аавдаа ирж чадахгүй ч тохиолдол гардаг. Цэргийн алба хаагчид ар гэртээ мэдээлэл хэлэх эрх байдаггүй гэдгийг та бүхэн сайн мэдэх биз. Ямар ч байсан хүүхэд маань өвдөж, эмнэлэгт хагалгаанд орох гэж байна. Манай хүүгээс гадна өөр нэг цэрэг эмнэлэгт хэвтэн эмчлүүлж байна. Хоёр өөр бие организмтай хүүхдүүд ижилхэн өвдөж, хагалгаанд орно гэж юу байх вэ. Бид хүүгээ дахин цэргийн албанд явуулахаас айж байна. Эмнэлгээс гараад цэргийн ангидаа дэглэм алдагдахаас айж байна. Эргээд үр хүүхэд маань дарамтлуулах байх гэсэн айдас байна. Өнөөдөр хагалгаанд орж эрүүл болсон ч ирээдүйд ямар хор уршиг гарахыг хэлж мэдэхгүй шүү дээ" гэв.