Парисын паралимп үргэлжилж байна. Өчигдөр/2024.09.03/ байт харвааны төрөл эхэлсэн бөгөөд Монгол Улсаа төлөөлөн Д.Сэлэнгээ, Б.Оюун-Эрдэнэ нар өрсөлдөв.

Чансаа тогтоох урьдчилсан харваанд Д.Сэлэнгээ 622 оноо авч, гуравдугаар байрт бичигдсэн бол Б.Оюун-Эрдэнэ 524 оноотой, 18 дугаар байрт бичигджээ. Улмаар өндөр оноо авсан Д.Сэлэнгээ эхний тойрогтоо гоц мөргөсөн бол Б.Оюун-Эрдэнэ эхний тойрогтоо Италийн Вероника Флоренотой учраа таарав.

Д.Сэлэнгээ хоёрдугаар тойрогтоо Украины Анна-Виктория Шевченкотой учраа таарч, 6-2 гэсэн харьцаатай ялжээ. Харин дараагийн тойрогтоо Словенийн Зива Лавринчтай учраа таарч 6-4 гэсэн харьцаатай ялж, хагас шигшээд шалгарсан юм.

Тэгвэл Б.Оюун-Эрдэнэ эхний тойрогтоо Италийн Вероника Флореног ялсан ч дараагийн тойрогтоо Хятадын Вү Чүнянд дийлджээ.

Ийнхүү Д.Сэлэнгээ хагас шигшээд Хятадын Вү Чүнянтай цэц мэргэнээ зорьж, 4-6 гэсэн харьцаатай ялагдсанаар хүрэл медалийн төлөө харвахаар болсон. Харамсалтай нь хүрэл медалийн төлөөх харваанд Италийн Элизабетта Мижно 6-2 гэсэн харьцаатай ялжээ.

Токиогийн паралимпод оролцож, дэлхийн аваргаас хүрэл медаль хүртэж байсан Д.Сэлэнгээ паралимпод дөрөвдүгээр байр эзэллээ.

Энэ төрлийн алт, мөнгөн медалийг Хятадын тамирчид болох Вү Чүнян, Вү Ян нар хүртжээ.