Ханиад томуугийн эхэлж байгаатай холбоотой эмч нар 18 хүртэлх насныхныг вакцинжуулалтад хамруулахыг зөвлөлөө.

Хүүхдийн зөвлөх зэргийн эмч А.ОЮУНЧИМЭГ:

-Энэ жилийн томуугийн А ба В хүрээний вакцин өмнө жилүүдийнхээс харьцангуй эрт эхэлж байна. Хүүхдийн эмч нарын хамгийн ихээр санаа зовоодог зүйл нь амьсгалын замын халдвар байдаг. Энэ халдвар нь өөрийн гэсэн нян болон вирусээр үүсгэгддэг. Үүний нэг нь томуугийн А ба В вирус байдаг. Амьсгалын замын халдвар нь уушгийг гэмтээдэг. Уушгийг гэмтээснээр үрэвсэж, улмаар хүүхэд амьсгалын дутагдалд орж энддэг. Урьдчилан сэргийлэх гол зүйл нь вакцин юм. Уг вакциныг 2-5 настай хүүхдүүдэд өрхийн эрүүл мэндийн төв болон сумын эрүүл мэндийн төвөөр хийж эхэлсэн. Вакцин хийлгэсэн хүүхдийн ханиад хүндрэхгүй, эндэхгүй гэсэн үг. Хүүхдийн уушгины хатгалгаа хүндрэл эндэгдлээс урьдчилан сэргийлнэ. Тиймээс эцэг эхчүүдэд томуугийн эсрэг вакцинжуулалтад хамрагдахыг зөвлөж байна.

Анагаах ухааны доктор, клиникийн профессор Ш.ЭНХТӨР:

-Хичээлийн шинэ жил эхлэхээс өмнө улс орон даяар томуу, томуу төст өвчний тархалтаас сэргийлэх үйл ажиллагаа эхэлж байна. Томуу, томуу төст өвчнөөс сэргийлэх үндсэн хоёр арга зам байдаг. Нэгд, өвөрмөц бус сэргийлэлт. Хоёрдугаарт өвөрмөц сэргийлэлт. Өвөрмөц бус сэргийлэлт гэдэг нь тухайн хүүхдийг чийрэгжүүлэхээс эхлээд, архаг өвчнийг эмчлэх, шим тэжээлтэй хоолоор хооллох, халдварт өвчнөөр өвчлөх эрсдэлийг бууруулах хэрэгтэй.  Үүнд дулаан хувцаслах, зөв цагт унтуулж амраах гэх мэт олон арга хэмжээ багтдаг. Өвөрмөц сэргийлэлт гэдэгт томуу, томуу төст өвчний вакцинжуулалт байдаг. Иймд эцэг эх, асран хамгаалагчид үүрэг, хариуцлагаа ухамсарлаж тав хүртэлх насны хүүхдүүдийг вакцинжуулах үйл ажиллагаанд идэвхтэй оролцохыг  уриалж байна.

Э.Эрдэнэбилгүүн