Энэтхэгийн өмнөд мужууд хүчтэй аадар борооны улмаас үерлэж, 25 хүн амиа алджээ. Телангана мужийн Гамшигтай тэмцэх, гал түймрийн албаны ерөнхий захирал Ю Наги Реддигийн хэлснээр сүүлийн 24 цагийн дотор 400 мм хэмжээтэй хур тунадас бүс нутагт орсон байна. Үерийг "үндэсний гамшиг" гэж зарлахыг тус мужийн эрх баригчид Энэтхэгийн засгийн газарт уриалжээ.

Мужийн эрх баригчдын гаргасан мэдэгдэлд "Бид үерийн хохирлын иж бүрэн тайланг төв засгийн газарт хүргүүлнэ. Ерөнхий сайд Нарендра Модид захидал илгээж, үерт нэрвэгдсэн бүс нутгуудад очиж үзэхийг хүснэ. Мөн Телангана дахь үерийг үндэсний хэмжээний гамшиг гэж зарлахыг шаардах болно" гэжээ.

Одоогоор Телангана мужид 3800 орчим хүнийг аварч, тусламжийн хуаранд шилжүүлээд байна. Энэтхэгийн Агаарын цэргийн хүчин Даваа гаригт Телангана болон хөрш Андра Прадеш мужид 200 гаруй аврагч офицер, 30 тонн яаралтай тусламж илгээжээ.

Аадар бороо жил бүр л их хэмжээний сүйрэл дагуулдаг ч гэлээ сүүлийн үед уур амьсгалын өөрчлөлтийн нөлөөгөөр цаг агаарын эрс тэс үзэгдлийн тоо улам нэмэгдэх болжээ. Өнгөрсөн долоо хоногт л гэхэд баруун Гужарат мужид хүчтэй аадар борооны улмаас дор хаяж 28 хүн амиа алдсан. Мөн зүүн хойд Трипура мужид өнгөрсөн сард болсон үерээр 20 гаруй хүн амиа алджээ.

Эх сурвалж: AL JAZEERA