ОХУ-ын ерөнхийлөгч В.Путин өнөөдөр /2024.09.03/ Монгол Улсад айлчилж буй. Уг айлчлалын талаар "Эрх чөлөө хөдөлгөөний"-ийн тэргүүн Ц.Чинбатаас тодрууллаа.

-ОХУ-ын ерөнхийлөгч В.Путинт Улаанбаатарт хүрэлцэн ирсэн. Та уг айлчлалыг эсэргүүцэж, төв талбай дээр үзэл бодлоо илэрхийлсэн. В.Путины айлчлалыг эсэргүүцэж буй шалтгаан юу вэ?

-Түүний айлчлал Монгол Улсын хувь тавилантай холбоотой асуудал гэж харж байна. ОХУ-ын ерөнхийлөгч В.В.Путин гэж энэ хүнийг дайны гэмт хэрэгтэн гэж дэлхий нийт үзэж байгаа учраас дэлхий нийт хүлээж авахгүй, ОХУ-ын ерөнхийлөгч гэж хүлээн зөвшөөрөхгүй байгаа. Хүүхдийг алсан алуурчин учраас цэргийн гэмт хэрэгтэн гэж үзээд байгаа шүү дээ. ОХУ-ын ерөнхийлөгчийн сонгуульд иргэдийнхээ саналыг хулгайлж гарч ирсэн хүн. Монгол олон улсын өмнө хүлээсэн үүрэг гэж бий тиймээс гэмт хэрэгтэнг барьж өгөх ёстой. Гэтэл Монгол Улсын парламент хүлээж авах гэж байна. Дайны гэмт хэрэгтэнг хүлээж авснаар, Монгол 1990 оноос өмнөх байдалдаа очно. Тийм учраас эсэргүүцэж байгаа юм. Эрх чөлөөт тусгаар тогтносон Монгол Улс гэж оршин тогтнохоо болино.

Х.Баттулгаар толгойлуулсан Оросын эх орончдоор дүүрсэн парламент бий болсон байна.

-Монголын төр засаг Оросын эрх ашигт үйлчиллээ гэж та буруутгаж байгаа юм байна, тийм үү? 

-Засгийн газрын тэргүүн Л.Оюун-Эрдэнэ Монгол, монгол үндэстний эрх ашгийн төлөө бус Оросын эрх ашгийг хамгаалдаг болсон байна.

Оросын компаниар 1.5 тэрбум еврогоор Гуравдугаар цахилгаан станцын өргөтгөлийг бариулах гэрээнд гарын үсэг зуруулах гэж урьж байна.

Ингэж Монголын эрх ашгийн эсрэг ажилладаг Засгийн газартай болжээ. Монголчууд өөрсдийнхөө эрх ашиг, тусгаар тогтнолын төлөө зогсохгүй бол Монгол Улс орхигдсон ертөнц болох нь. Бид соёлт хүн төрөлхтөнтэй мөр зэрэгцэж байж улс үндэстэн хөгждөг. Бид хүссэн газар орондоо очиж чаддаг болсон байна. Энэ бол эрх чөлөөний буян. Яг ийм үед Оросын ерөнхийлөгчийг хүлээж авч байгаа нь буруу, ингэснээр бид орхигдсон ертөнц болно. Орос улс  Украин гэж тусгаар тогтносон эрх чөлөөт улс руу эзлэн түрэмгийлж байгаа нь 21-р зуунд маш бүдүүлэг зүйл. Украины аз жаргалтай амьдрал атаархсан, эзлэн түрэмгийлсэн дайн хийж байна. Цаг хугацааны хувьд Украин ялна. Бид бүдүүлэг Орос улсаас салсан цагт дайны үр дүн сайнаар тусна. Монгол Улсын эрх ашиг нэгд байх ёстой. Улс үндэстнээрээ Оросын нэг муж шиг амьдрах хувь тавилан бидний үр хүүхдэд хэрэггүй. Мөн Халхын голын байлдааны 85 жилийд ирж байгаа гээд байгаа юм. Бид Халхын голын дайнд ялаагүй. Монгол Улс 68 мянган километр талбайгаа алдсан. Оросыг төлөөлөх чадваргүй гэмт хэрэгтэнг хүлээж авч байгаад эсэргүүцэж байна.