Оросын алс дорнод дахь Камчаткын хойгийн галт уулын ойролцоо 22 хүн тээвэрлэж явсан "Ми-8т" нисдэг тэрэг Бямба гаригт сураггүй алга болсон. Нисдэг тэргэнд 19 зорчигч, хөлгийн багийн гурван гишүүн байжээ. Уг нисдэг тэрэг нь Камчаткад төвтэй "Витьяз-аэро" компанийн мэдэлд байдаг бөгөөд жуулчдад үйлчилдэг. 

Ослын газарт ажиллаж буй аврах багийнхан нисдэг тэрэгний сэгийг 900 метрийн өндөрлөг бүсээс олсон бөгөөд нэг ч хүн амьд үлдээгүй гэж мэдэгдсэн. Өнөөдрийн байдлаар 17 хүний цогцос олоод буйг ОХУ-ын Онцгой байдлын яамны ажилтан Иван Лемихов мэдэгдлээ.

Москвагаас зүүн зүгт 7000 гаруй км зайд орших Камчаткын хойг нь сүүлийн долоо хоногийн турш циклон салхинд нэрвэгдсэн. Нисдэг тэрэг алга болсон өдөр Камчатка мужид үзэгдэх орчин муу, шиврээ бороо орж, манантай байжээ. Идэвхтэй галт уул, байгалийн унаган төрхөөрөө алдартай тус газрыг зорих жуулчин олон байдаг бөгөөд зөвхөн онгоцоор л зорчих боломжтой. Тус бүс нутагт онгоц, нисдэг тэрэгний осол маш их тохиолддог ажээ. Тухайлбал, 2021 оны наймдугаар сард 16 хүнтэй нисдэг тэрэг үзэгдэх орчин хязгаарлагдмал нөхцөлд осолдож, найман хүн нас барсан. Мөн оны долдугаар сард хойгт газардах гэж байгаад 22 зорчигч, хөлгийн багийн зургаан гишүүнтэй онгоц осолдон, бүх хүн нь нас баржээ.

Эх сурвалж: THE TELEGRAPH