Оросын тэнгисийн цэргийн хүчинд харьяалагддаг байх магадлалтай цагаан халим 2019 онд анх Норвегид үзэгдэж байв. Тухайн үед Норвегийн Загас агнуурын газрын далайн биологичид халимны хүзүүнд бэхэлсэн камер, хүзүүвчийг салгаж байжээ. Тус бэхэлгээн дээр "Санкт Петербург" гэсэн тэмдэглэгээ байсан учир Оросын тагнуул байж болзошгүй гэж дүгнэсэн юм.

Хүнд дассан байдлыг нь мөн харгалзан үзээд Оросын тэнгисийн цэргийн хүчний сургуультай амьтан байж магадгүй гэж үзжээ.

Тэгвэл "Хвалдимир" хочит халим Норвегид үхсэн байдалтай олдсоныг түүний хөдөлгөөнийг хянадаг төрийн бус байгууллага "Marine Mind"-аас мэдээлэв. Рисавикагийн баруун өмнөд эргээс өнгөрсөн Бямба гаригт түүний цогцсыг олжээ. Цогцсыг шинжилж үзэхэд ил харагдахуйц гэмтэл илрээгүй. Тиймээс задлан шинжилгээнд оруулж, үхсэн шалтгааныг тодруулах аж.

"Хвалдимир"-ыг 14-15 настай байсан гэж таамагладаг. Халим 40-60 насалдаг учир "Хвалдимир" харьцангуй залуу байжээ. Энэ төрлийн цагаан халим нь ихэвчлэн Гренланд, Норвеги, Оросын хойд хэсгийн усанд амьдардаг ба зургаан метр урттай байдаг.

Эх сурвалж: AFP