Хан-Уул дүүргийн арваннэгдүгээр хороо Богд уулын арын зам буюу Буган халиуны уулзвараас Маршалын гүүр хүртэлх авто замыг шинэчилж, өнөөдөр /2024.09.02/ хөдөлгөөнийг нээсэн байна. Тус замын хөдөлгөөнийг наймдугаар сарын 30-ны өдөр хаагаад байсан юм. Энэ хугацаанд асфальт бетон хучилтыг хийжээ.

Мөн өнөөдөр Баянгол дүүргийн 19 дүгээр хороо, Х.Чингүнжавын гудамж буюу Өргөө кино театрын уулзвараас Дилав хутагт Жамсранжавын гудамжны уулзвар хүртэл авто замыг шинэчилж, хөдөлгөөнийг нээсэн байна.

Энэ онд нийслэлийн Замын сангийн хөрөнгөөр 17 байршилд 19.5 км авто замыг шинэчилсэн. Тухайлбал, Баянзүрх дүүргийн долоо, Сүхбаатар дүүргийн хоёр байршилд авто зам шинэчилсэн бол алслагдсан гурван дүүргийн таван байршилд шинэчлээд байгаа юм. Харин одоо дүүргүүд өөрсдийн худалдан авах газрын төсвийн хүрээнд өөрсдийн хороодын явган хүний болоод авто замуудыг шинэчилж эхэлжээ.