Ромын Пап лам Францис 12 хоногийн хугацаатай Ази-Номхон далайн орнуудад айлчлах гэж байна. Шинжээчдийн үзэж буйгаар энэ айлчлал нь түүний хувьд хамгийн урт, хол зайтай, чадал шаардсан явдал болно. Пап Францис айлчлалын хүрээнд уур амьсгалын өөрчлөлт, итгэл үнэмшилд үнэнч байдал болон католик сүмийн үйл хэргийг таниулж, сурталчилна.

Өдгөө 87 настай тэрбээр Даваа гаригаас эхлэн Индонез, Папуа Шинэ Гвиней, Зүүн Тимор, Сингапурт айлчлах бөгөөд 32 мянга гаруй километр ниснэ.

Ази-Номхон далайн орнуудад хийх айлчлал 2020 онд төлөвлөгдсөн байсан ч "Covid-19" тахлын улмаас хойшлогдоод байжээ. Түүний айлчлал Азийн католик итгэл үнэмшилтэй нийгэмлэгийн хувьд чухал үйл явдал гэдгийг Ватикан онцлоод байна. Италийн академич Массимо Фаггиоли хэлэхдээ "Францис 40 гаруй арга хэмжээнд оролцоно. Энэ айлчлал Пап лам Францисын хүч чадлыг илтгэнэ" гэсэн байна.