Хагас дамжуулагчийн үйлдвэрлэлээр дэлхийд тэргүүлэгч "TSMC" Японд 2030 он гэхэд гурав дахь үйлдвэрээ нээхээр төлөвлөж буйг Тайванийн Эдийн засгийн сайд Куо Жих-Хуэй хэллээ. Япон дахь өмнөх хоёр үйлдвэр нь Кумамото мужид байрладаг. Гурав дахь үйлдвэрийн тухайд дэвшилтэт чип үйлдвэрлэлд төвлөрөх бөгөөд байрлал нь тодорхойгүй байна.

Эдийн засгийн сайд Куо Жих-Хуэй хэлэхдээ "Туршлагатай инженерүүд дэвшилтэт чип үйлдвэрлэхэд зайлшгүй шаардлагатай. Японд энэ талын туршлага дутмаг. Ажиллах хүчний цоорхой 2030 он гэхэд ч нөхөгдөхгүй байх магадлалтай" гэжээ.

Мөн тэрбээр чадварлаг инженерийн боловсон хүчнийг хөгжүүлэх тал дээр Японтой хамтран ажиллах хүсэлтэй байгаагаа илэрхийлэв.

Геополитикийн эрсдэлээс шалтгаалаад Япон улс хагас дамжуулагчийн нийлүүлэлтийн сүлжээг бэхжүүлэхэд хүчин чармайлт зарцуулж буй. Тус улсын "Rapidus" компани өдгөө хамгийн сүүлийн үеийн 2 нанометрийн чипийг бөөнөөр үйлдвэрлэх үйлдвэрийг Хоккайдод барьж байна.

Эх сурвалж: TSMC