Удаан хүлээсэн "F-16" онгоцууд Украинд ирээд удаагүй байна. Гэвч онгоц ирснээс хэдхэн долоо хоногийн дараа Украины шилдэг нисгэгч онгоцтойгоо осолдож амиа алджээ. Тодруулбал, "Сарны загас" хочит Олексий Мес Даваа гаригт Оросын томоохон довтолгоог няцаах үедээ осолдож амь үрэгдсэн байна. Украины Батлан хамгаалах яам энэ хэргийг нисгэгчийн алдаа байсан гэж үзэхгүй байна. Ослын шалтгааныг олон улсын шинжээчдийн тусламжтайгаар тодруулах аж.

Украины арми Оросын довтолгоотой тэмцэхийн тулд хэд хэдэн "F-16" онгоцыг зенитийн пуужингийн ангиудын хамт байрлуулжээ.

Нисгэгч Олексий Мес нас барсан нь Украины армийн хувьд томоохон цохилт болж байна. Анхны "F-16" онгоцууд энэ сарын эхээр л Украинд ирсэн бөгөөд Олексий Мес нь тэднийг удирдахаар бэлтгэгдсэн цөөхөн нисгэгчдийн нэг байв.

Украины нисгэгчид өнгөрсөн намраас АНУ-д "F-16" онгоцны сургуулилалтыг эхлүүлсэн. Бүрэн дадлагажиж, онгоцыг жолоодож сурах хүртэл урт хугацаа шаардагдана. Харин Олексий Мес болон бусад нисгэгчийн хувьд үүнийг зургаан сарын дотор сурах шаардлагатай болсон юм.

Олексий Мес болон Андрей Пилщиков нарын нисгэгчид нь Украины "F-16" онгоц авах кампанит ажлын нүүр царай байжээ. Гэвч Андрей Пилщиков өнгөрсөн наймдугаар сард мөн онгоцны ослоор нас баржээ.

Эх сурвалж: CNN