Яармагийн гүүрийг нэгдүгээр хороололтой холбох, гүүр, автозамын бүтээн байгуулалтын явцын талаар нийслэлийн Замын хөгжлийн газрын, барилга инженерийн байгууламжийн хяналтын хэлтсийн газрын дарга Т.Батбилэгээс тодрууллаа.

-Яармагийг нэгдүгээр хороололтой холбох гүүрийн бүтээн байгуулалтын ажлын явц хэдэн хувьтай явж байна вэ? Хэзээ ашиглалтад оруулахаар байна.

-Яармаг орчмын түгжрэлийг сааруулах зорилгоор тус гүүрийг барьж байгаа. Гурван гүүр, холбоос зам гэсэн хоёр хэсгээс бүрдэж байна. Гүүрийн ажил 2022 оны есдүгээр сард эхэлсэн. Автозамын ажил 2023 наймдугаар сард эхэлсэн. Уг бүтээн байгуулалтын ажлыг хийснээр Яармагийн авто замын түгжрэлийг 20 орчим хувиар бууруулна гэж үзэж байгаа.

-Тус гүүрийг өнгөрсөн зургаадугаар сард ашиглалтад оруулна гэж албаныхан мэдээлж байсан. Гэвч хугацаандаа ашиглалтад оруулаагүйн дээр Яармаг талын далан борооны усанд автсан. Үүнийг хэрхэн шийдэж байгаа вэ, дахин ирэх жилийн бороо усанд автахгүй байх баталгаа бий юу?

– Энэ жил нийт нутгаар хур бороо элбэг байлаа. Үүнээс үүдэж Туул гол олон жилийн дунджийг давж үерлэсэн. Урд далангийн хувьд чиглүүлэх далангийн суурь явагдаж байна. Үерт автахгүй байх тооцоо судалгааг мэргэжлийн хүмүүс хийсэн. Гүүрийн ажил 97 хувийн гүйцэтгэлтэй явж байна. Авто замын ажил 80 гаруй хувьтай байна. Далангийн ажил дууссан. Хашлага тавих, буталсан  чулуун суурийн ажил хийгдэж байгаа. Холбоос зам олон цогц ажлаас бүрдэж байна. Тодруулбал,

зургаан метрийн өргөнтэй автозам, борооны ус зайлуулах шугам, гэрэлтүүлэг, дугуй болон явган зам гэсэн хэсгээс бүрдсэн цогц  бүтээн байгуулалт юм.

Мөн ус суваг, дулааны ажил зэрэг ажлууд хийгдэж байна. Есдүгээр сарын 10-наас асфальт хучилтын ажлыг хийнэ. Зорчих хэсгийг есдүгээр сард нээхээр төлөвлөж байна. Бүх ажил зураг төслийн дагуу, инженерийн тооцоо судалгаатай хийгдэж байгаа. Нийтдээ 391 метрийн урттай гүүр барьж байгаа. Бороо, үер уснаас үүдэж хугацаандаа ашиглалтад орох боломжгүй болсон. Аравдугаар сарын 1-ээс зорчих хэсгийг бүрэн нээхээр төлөвлөж байна. ” гэв.