Трампад гомдол гаргасан 3 дахь уран бүтээлч "Абба" болов

Дональд Трамп сонгуулийн кампанит ажилдаа дууг нь ашигласан гэж энэ сард гомдол гаргасан гурав дахь хамтлаг "Абба" боллоо. "Абба" хамтлагийн "Dancing Queen" тэргүүтэй хит дуунуудыг сүүлийн үеийн арга хэмжээнүүд дээр зөвшөөрөлгүй ашигласан бичлэгээ яаралтай устгахыг тэд шаардаж байна. Хамтлаг мэдэгдэл гаргахдаа "Трамп кампанит ажилдаа манай дууг зөвшөөрөлгүй ашигласныг бид саяхан цахим сүлжээнээс олж мэдсэн. Тиймээс бид болон манай төлөөлөгчид энэ контентоо яаралтай устгахыг шаардаж байна. Бидэнд ямар ч хүсэлт ирээгүй. Тэгэхээр ямар ч зөвшөөрөл, лиценз олгоогүй гэсэн үг" гэжээ.

"Абба"-аас өмнө "Foo Fighters", Селин Дион нар гомдол гаргасан. Трампийн кампанит ажлын багийнхан "Foo Fighters"-ын "My Hero", Селин Дионы "My Heart Will Go On" дуунуудыг ашиглажээ.

Трамп анх удаа ийм хэрэг тарьж байгаа юм биш. Тэрбээр энэ оны эхээр нэгэн арга хэмжээний үеэр "Smiths" хамтлагийн "Please, Please, Please, Let Me Get What I Want" дууг ашиглажээ. Сүүлд нь хамтлагийн гитарчин Жонни Марр Трампад хандаж "Өө за за, ийм зүйл тохиолдоно гэж зүүдэлж ч явсангүй. Наад новшийн юмаа яг одоо зогсоож өгнө үү" гэж хэлсэн.

Мөн "Aerosmith", Оззи Осборн, Шэрон Осборн, Рианна нар ч өмнө нь ижил шаардлагыг Трампад тавьж байсан удаатай.

Эх сурвалж: SKY NEWS