Шинэ Зеландын Маори үндэстний хаан Киингитанга Тухеитиа VII 69 насандаа таалал төгсжээ. Хэвлэлийн төлөөлөгч Рахуй Папа мэдээлэхдээ, хаан Тухеитиа хаан ширээнд суусныхаа 18 жилийн ойг тэмдэглэснийхээ дараа зүрхний хагалгаанд орж, эмнэлэгт хэвтэж байсан. Гэхдээ таалал төгс, гэр бүлийнхээ гишүүдийн дэргэд амар тайван хорвоог орхисон гэжээ.

Хаан Тухеитиа 1955 онд төрсөн. Тэрээр 2006 онд ээж Те Арикинуи Даме Те Атайрангиаху нь нас барсны дараа хаан титэм зүүжээ.

Залгамжлагчийг оршуулах ёслол дууссаны дараа зарлах аж.  Шинэ Зеландын хэвлэл мэдээллийн хэрэгслүүд Тухеитиа  хааныг  Маоригийн эх газар Турангавэва Марае мужид аваачиж, тав хоног гашуудал зарлана гэж мэдээлэв. Дараа нь Таупири ууланд оршуулах аж.

Маори үндэстэн Их Британийн колоничлолд газар нутгаа алдахаас сэргийлэн үндэстнийхээ өв уламжлал, соёлыг хадгалахын тулд 1858 оноос эхлэн хаантай болсон байдаг.

Маори нь Шинэ Зеландын уугуул иргэд бөгөөд нэгдмэл байдлыг чухалчлан хаанаа тодруулдаг аж. Шинэ Зеландын ерөнхий сайд Кристофер Луксон таалал төгссөн хаанд хүндэтгэл үзүүлж, "Түүний ард түмнийхээ төлөө хоёргүй сэтгэлээр зүтгэж, Киингитанга үндэстний үнэт зүйл, ёс заншлыг сахин хамгаалахын төлөөх цуцашгүй хичээл зүтгэл нь манай оронд тод ул мөр үлдээсэн" гэжээ. Ерөнхий сайд асан Дэм Жакинда Ардерн хаан Тухеитиаг  "Та Маори улсын шударга ёс, хөгжил цэцэглэлтийн төлөөх тэмцэгч байсан. Та хүүхэд, залууст итгэл найдвар авчрахын төлөө тэмцэж байсан" гэж гашуудлаа илэрхийлсэн байна.

Эх сурвалж: BBC