Газын зурваст полио вирусийн халдвар тархсантай холбогдуулан ДЭМБ-аас Палестины хүүхдүүдийг дархлаажуулах болсон. Гэхдээ үргэлжилж буй дайнаас болж вакцинжуулах аянд саад  учирч магадгүй тул ДЭМБ-ын удирдлага Израильд түр гал зогсоох хүсэл тавьсан байна.  Израильд хүсэлтэд зөвшөөрч, ирэх Бямба гаригаас эхлэн гурван өдрийн турш өглөөний 06:00 цагаас 15:00 цаг хүртэл гал зогсооно.

Тодруулбал, полио вирусийн вакциныг Газын өмнөд, төв, хойд хэсэгт гурав хувааж хийнэ. Вакцин хийж буй хэсэгт тухайн хугацаанд гал зогсоох бөгөөд нийт 640 мянган хүүхдийг хамруулахаар төлөвлөж байна.

ДЭМБ-ын мэдээлснээр, Газын зурваст полио вирусийн халдвар 25 жилийн өмнө тархаж байсан. Энэ удаа дайны нөхцөл байдлаас үүдэн Газад эрүүл ахуйн шаардлага хангасан орчин үгүй болж, ундны уснаас илүү шалбаагийн усыг иргэд ашиглаж байгаа юм. Халдвар тархсаны улмаас 10 сартай хүүхэд хагас саажилттай болсноор Израиль ДЭМБ-ын хүсэлтийг хүлээн авсан байна.

Полиомиелитийн хоёрдугаар төрлийн (nOPV2) амны хөндийн вакцины 1.26 сая орчим тун Газын зурваст хэдийнээ хүргэгдсэн байгаа бөгөөд нэмэлтээр 400 мянган тун вакцин тун удахгүй хүргэгдэнэ.

Вакцинжуулалтын аяныг Палестины Эрүүл мэндийн яам, ДЭМБ, UNICEF, "UNRWA"-тай хамтран зохион байгуулж буй. Мөн 2000 гаруй эрүүл мэнд, олон нийтийн үйл ажиллагаатай холбоотой ажилчдыг вакцин хийх сургалтад хамруулсан байна. ДЭМБ вакцинжуулалтад нийт хүүхдүүдийн 90 хувийг зайлшгүй хамруулахаар хичээж байгаа ба шаардлагатай тохиолдолд аяныг дахин нэг хоногоор сунгана. Полио вирус нь маш халдвартай бөгөөд ихэвчлэн бохир усаар дамждаг. Хүндэрсэн тохиолдолд саажилттай болж, амь насанд аюултай юм.

Эх сурвалж: BBC