Чингэлтэйн өргөн чөлөө буюу 32-ын тойргоос Хайлаастын уулзвар хүртэлх авто замыг 27-ны өдрөөс хөдөлгөөнийг хааж, хучилтын ажлыг гүйцэтгэн өнөөдөр нээлээ. Нэг км урттай, 14-16 метрийн өргөнтэй дөрвөн эгнээтэй тус авто замыг шинэчлэх ажил өнөөдөр дуусч, нээсэн байна.

НЗХГ-ын Засвар арчлалтын хяналтын хэлтсийн мэргэжилтэн Б.Басхүү “Тус авто замыг шинэчлэх ажлын хүрээнд нүхэн эвдрэлийг засах, ус зайлуулах худгийн тагыг өндөрлөх болон авто замын тэмдэг тэмдэглэгээний ажлыг хийж гүйцэтгэлээ. Авто замын хашлаганы стандарт нь зорчих хэсгээс явган зам хүртэл 15 см-ээс доошгүй байна гэж заасан байдаг. Энэ нь явган хүн болон авто машины заагийг гаргаж өгөхөөс гадна замын суурь бүтэц рүү ус оруулахгүйгээр замын насжилтыг уртасгах зорилготой байдаг. Иймд бид стандартын дагуу хашлагыг хийж гүйцэтгэж байна” гэлээ. Энэ онд нийслэлийн нийт авто замын 70 хувийг шинэчлэх бөгөөд өнөөдрийн байдлаар 30 гаруй хувьтай үргэлжилж байна.