Ихэнх сургуулийн хичээлийн шинэ жил эхэлж, оюутнууд ч эрдэм номдоо шамдан суралцаад эхэлжээ. Энэ жил урьд урьдын намруудтай харьцуулахад оюутны гудамж ч тэр, оюутны байр ч ялгаагүй нам гүм байна. Бид энэ удаагийн фото сурвалжлагаараа оюутан болоод засвар нь дуусаагүй оюутны байрыг сурвалжиллаа.

2024-2025 оны хичээлийн жилд 69 их, дээд сургуульд 140 мянга орчим оюутан суралцана. Одоогоор улсын их сургуулиудын хичээл бүгд танхимаар орж эхлээгүй байгаа бөгөөд Монгол Улсын боловсролын их сургууль, Хөдөө аж ахуйн их сургууль, Хүмүүнлэгийн ухааны сургуулиудын хичээл эхэлсэн бол Монгол улсын их сургууль, Анагаахын шинжлэх ухааны их сургууль, Соёл урлагийн их сургуулиудын хичээл хараахан эхлээгүй.

Ирэх долоо хоногт хичээл нь эхлэх тус сургуулиудаар очиход нам гүм, оюутан болоод оюутны хөгжлийн төв, харилцах албаны мэргэжилтэн зэрэг цөөн хүмүүс л байсан юм.

Оюутнуудын хувьд төлбөр болоод хичээл сонголттой холбоотой асуудлаар сургууль дээрээ ирсэн хэмээн ярилцаж байлаа.

ХИЧЭЭЛ ЭХЭЛСЭН Ч ОЮУТНЫ БАЙРНЫ ЗАСВАР ДУУСААГҮЙ БАЙНА

Оюутнуудын хувьд жил бүрийн намар тулгардаг хамгийн гол асуудал бол тухайн жилдээ байх байр. Оюутны тоо жилээс жилд өсөхийн хэрээр улсын сургуулийн оюутны байранд квот олно гэдэг тун хэцүү. Ямар сайндаа л ихэнх их, дээд сургуулийн оюутнууд сугалаагаар байранд орж буй. Тухайлбал, Оюутны өргөө гэхэд л 35-40 оюутны дунд 3-5 өрөөний квот сугалуулж байгаа юм. Мөн нөгөө талдаа хичээл эхлэх болсон ч оюутны зарим байр засварын ажил нь дуусаагүй байна.

Үүний нэг жишээ нь МУИС-ийн хоёрдугаар дотуур байр.