АНУ-ын Невада мужийн улстөрч  47 настай Роберт Теллес албан тушаал хашиж байхдаа сэтгүүлчийн аминд санаатай хүрсэн нь тогтоогджээ. Шүүхээс түүнийг нэгдүгээр зэргийн хүн амины хэрэг үйлдсэн гэж үзэн бүх насаар нь хорих ял оноов. Роберт Теллес 2022 оноос хойш "Las Vegas Review-Journal" сэтгүүлийн эрэн сурвалжлах сэтгүүлч Жефф Германыг хутгалсан хэргээр шоронд хоригдож буй. Жефф Герман нь Невада мужийн улстөрч Теллесийн талаар шүүмжлэлтэй нийтлэл бичсэний улмаас амиа алдсан гэж тангарагтны шүүх үзжээ. Шүүх хурлын үеэр прокурорууд амиа алдсан Германы хумснаас олдсон Теллесийн ДНХ-г нотлох баримт болгон танилцуулсан.

Теллесийн хувьд өөрийгөө гэм буруугүй гэж удаа дараа мэдэгдсэн байна. Шүүх хурал 12 хүний бүрэлдэхүүнтэйгээр хоёр хоногийн турш үргэлжилжээ.

Шүүх өнгөрсөн Лхагва гаригт эцсийн дүгнэлтээ гаргасан ба тангарагтны шүүхийн бүрэлдэхүүн бүтэн 12 цагийн турш хэлэлцсэний эцэст хорих ял оноосон. Гэхдээ Теллес 20 жилийн дараа давж заалдах, батлан даалтаар суллагдах боломжтойгоор шийдвэрлэгджээ. Теллес шүүх хурал дууссаны дараа "Энэ бүх зүйл гүтгэлэг. Би гүтгэгдсэн. Би ямар ч буруугүй. Би Германыг алаагүй" гэж орилж байсан байна. Хэргийг сөхвөөс, 2022 оны есдүгээр сард 69 настай Герман Невада муж дахь гэрийнхээ гадаа хүзүү, их биедээ долоон удаа хутгалуулж, амиа алдсан байдалтай олджээ.

Герман нас барахаасаа өмнө Теллесийн зохисгүй зан авирын талаар нийтлэл бичсэн байдаг.

Мөн Теллесийн доод албан тушаалтнууд түүнийг ажлын байран дээр бусдыг дарамталдаг гэх мэт цуурхал тараасан байна. Прокурорын мэдүүлснээр, Теллес Германы нийтлэлээс болж төрийн захиргааны албан тушаалд хоёр дахиа сонгогдож чадаагүй тул өшөө авах сэдлээр аллага үйлдсэн. Цагдаагийн газраас сэргээсэн хяналтын камерын бичлэгт Германыг хөнөөсөн алуурчин нь хар малгайтай цамц, пүүз өмссөн байсан ба биеийн хэмжээ нь Теллестэй ойролцоо байсан аж.

Эх сурвалж: BBC