Хот, хөдөөгүй өвөлдөө бэлдэж, засвар шинэчлэлт, зам талбайн ажлууд үргэлжилж буй. Энэ онд нийслэлийн Замын сангийн хөрөнгөөр 17 байршилд 19.5 км авто замыг шинэчилсэн. Тухайлбал, Баянзүрх дүүргийн долоо, Сүхбаатар дүүргийн хоёр байршилд авто зам шинэчилсэн бол алслагдсан гурван дүүргийн таван байршилд шинэчлээд байгаа юм. Харин одоо дүүргүүд өөрсдийн худалдан авах газрын төсвийн хүрээнд өөрсдийн хороодын явган хүний болоод авто замуудыг шинэчилж эхэлжээ.

Тухайлбал, хамгийн сүүлд гэхэд энэ сарын сүүлчээр Сүхбаатар дүүргийн худалдан авах ажиллагааны албанаас хороодын явган хүний зам засварын ажлыг тав, таван хороогоор нь хэсэгчилж тендер зарласан байна.

Зөвхөн тухайн дүүрэгт гэхэд нийт 20 хорооны явган хүний замыг шинэчлэхээр болсон бөгөөд төсөвт өртөг нь нийт 723 сая төгрөг байна. Хороо бүрийн хэсэгчилсэн засварт 137-148 сая төгрөг төсөвлөжээ. Тендерийн сонгон шалгаруулалт энэ сарын 30-нд буюу Баасан гаригт  дуусах аж.

НИЙТ 19.5 КМ УРТ ЗАМЫГ БҮРЭН ШИНЭЧИЛСЭН

Зам засварын ажлууд эхэндээ олны хэл амыг ихээр авч байв. Харин шинэчилсний дараагаар иргэд шинэчилсэн нь зөв байна гэдгийг хэлж байлаа. Энэ жил хийгдсэн зам засварын ажлуудыг дурдвал, Баянзүрх дүүрэгт:

• Намьяанжугийн гудамжны авто замын хэсэгчилсэн засвар, шинэчлэлтийн хүрээнд 1.1 км авто зам,
• Амгалангийн авто замын хэсэгчилсэн засвар, шинэчлэлтийн хүрээнд 2.4 км авто зам,
• Соёолжийн нүхэн гарц орчмоос Нарантуул олон улсын худалдааны төвийн уулзвар хүртэл 0.9 км авто зам,
• Нарантуул олон улсын худалдааны төвийн уулзвараас Өгөөмөр зах хүртэл 0.74 км авто зам,
• Дүнжингарав худалдааны төвийн урд талын авто авто замын хэсэгчилсэн засвар, шинэчлэлтийн хүрээнд 1.5 км авто зам,
• Нийслэл хүрээ өргөн чөлөөний авто замын хэсэгчилсэн засвар, шинэчлэлтийн хүрээнд 0.4 км авто зам,
• Хилчний гудамжны авто замын хэсэгчилсэн засвар, шинэчлэлтийн хүрээнд 0.9 км авто зам,

Сүхбаатар дүүрэгт:

• Тавдугаар сургуулийн уулзвараас Их сургуулийн гудамж хүртэл 0.45 км авто зам,
• Цэцэг төвийн уулзвараас Цаг уурын уулзвар хүртэл, Зоос гоёлын уулзвараас ШУТИС-ийн уулзвар хүртэл 1.8 км авто зам,

Алслагдсан гурван дүүрэгт:

• Багануур дүүргийн нэгдүгээр хороо, Эрүүл мэндийн уулзвараас Соронзын уулзвар хүртэл 0.87 км авто зам,
• Налайх дүүргийн нэгдүгээр хороо, “Буян налайх” төвийн уулзвараас Уурхайчдын 14 дүгээр гудамж хүртэл 0.9 км авто зам,
• Налайх дүүрэг дөрөвдүгээр хороо 37А байрны ар талын 1800 ам метр авто зогсоол,
• Налайх дүүрэг 2300 ам метр авто замын засвар арчлалтын ажил,
• Багахангай дүүрэг 850 ам метр авто замын засвар арчлалтын ажил,

Дээрх ажлын хүрээнд авто замыг асфальт бетоноор хучиж, инженерийн шугам сүлжээний худгийн тагийг асфальт бетон хучилтын түвшинд тааруулах, шинээр ус зайлуулах шугам сүлжээ суурилуулах, хашлага солих, тэмдэг тэмдэглэгээг мөн хийсэн байна.