“Парис-2024” зуны 17-р паралимпийн наадам наймдугаар сарын 28-аас есдүгээр сарын 8-ны өдрүүдэд болно. Гэвч Парис хотын метроны систем хөгжлийн бэрхшээлтэй иргэд зорчих бараг боломжгүй байгааг Бүс нутгийн тээврийн газрын дарга Валери Пекресс мэдэгджээ. Тэрбээр Даваа гаригт мэдэгдэл хийхдээ "Паралимпийн наадам эхлэхэд ганц өдөр үлдээд байхад хотын нийтийн тээврийн сүлжээ хөгжлийн бэрхшээлтэй хүмүүс ашиглах бараг боломжгүй байна. Төмөр замын системийн 25 хувь нь л тэргэнцэртэй хүн зорчих боломжтой гэж байгаа. Метроны систем ялангуяа онцгой муу байна" гэжээ.

Парисын анхны метро 1900 онд нээгдсэн бөгөөд сүлжээ нь Европын Холбооны хамгийн ачаалалтай систем болон өргөжсөн. Тодруулбал, 300 гаруй буудлаар өдөрт дөрвөн сая гаруй зорчигч зорчиж байна. Нийт 16 чиглэлийн шугам байна. Гэвч 29 буудал л тэргэнцэртэй хүн зорчих боломжтой аж. Он удаан жил болсон түүхэн шугамууд эмзэг сэдэв хэвээр байгааг Бүс нутгийн тээврийн газрын дарга Валери Пекресс хэлсэн байна.

Тэрбээр асуудлыг шийдэхийн тулд дорвитой хүчин чармайлт гаргахыг уриалж байна. Метроны системийг хүртээмжтэй болгож шинэчлэх боломжтой. Гэхдээ үүнд 20 жилийн хугацаа, 15-20 тэрбум еврогийн хөрөнгө оруулалт шаардагдах юм. Тиймээс ирэх 10 жилийн хамгийн том төсөл нь метроны шинэчлэл байж магадгүй гэж үзэж байна.

Наадмын үеэр тамирчдыг тэмцээн болох газарт нь хүргэхийн тулд 100 орчим микроавтобус гаргах зэрэг шийдэл гаргажээ. Паралимпийг үзэхээр 300 мянган хүн ирнэ гэж тооцоолсон. Энэ нь болж өнгөрсөн олимпийн наадын зочдын тэн хагастай тэнцэх юм.

Эх сурвалж: FRANCE24