Украины арми Мягмар гаригт ОХУ-ын Белгород руу хил дамнасан дайралт эхлүүлжээ. Оросын цэргийн блоггеруудын мэдээлснээр Украин хуягт тээврийн хэрэгсэлтэйгээр Нехотеевка хилийн шалган нэвтрүүлэх боомт руу өглөө эрт дайрсан байна. Белгород руу нэвтрэх оролдлого хийж буй украин цэргийн хэмжээ тодорхойгүй байна. ОХУ-ын хууль сахиулах байгууллагатай холбоотой гэж яригддаг "Mash" телеграм хуудсанд мэдээлснээр явган цэргийн байлдааны машинтай 200 орчим украин цэрэг Нехотеевкагаар нэвтрэхийг завдсан аж. Мөн ажиллагааны цар хүрээ, хүний тоо нь Курскийн дайралтын эхэн үетэй ойролцоо байгааг мэдээлэв.

Харин Белгород мужийн захирагч Вячеслав Гладков мэдээлэл өгөхдөө "Украины арми Белгородын хилийг нэвтлэх гэж байна гэсэн мэдээлэл гарчээ. Хилийн нөхцөл байдал хүнд байгаа ч хяналтад байгаа гэдгийг Батлан хамгаалах яам мэдээлсэн" гэжээ.

Хөрш зэргэлдээх Курскийн тулаан эхэлснээс хойш Украин 1300 км/кв орчим талбайг эзэлжээ. Үүнээс болоод ОХУ бүс нутагт 30 мянган цэргээ оруулахаас өөр аргагүй болсон байна.

Курскийн ажиллагааг сонгодог довтолгоо гэж Британийн танкийн командлагч асан Хамиш де Бреттон-Гордон тодорхойлсон. Тэрбээр "Сул талыг нь ашиглан оросуудад юм бодуулж, хэцүү шийдвэр гаргуулна. Тэд Курскийг бэхжүүлэх гэж оролдохын зэрэгцээ Белгород руу харах хэрэгтэй болно" гэв.

"Одоогоор Украины зорилго бол хэлэлцээр хийх сайн байр суурьтай байхын тулд Оросын газар нутгаас аль болох булаан авах явдал юм. Мөн Оросын хүчнийг зүүн Украинаас өөр тийш чиглүүлж, хамгаалалтын бүс байгуулах явдал. Белгородын халдлага нь энэ стратегийн нэг хэсэг юм шиг санагдаж байна" гэж Их Британийн Хатан хааны нэгдсэн үйлчилгээний институтийн ажилтан Натия Сескуриа хэлжээ.

Эх сурвалж: THE TELEGRAPH