Японы сансрын агентлаг "JAXA" найман сарын өмнө саран дээр "Smart Lander for Investigating Moon" буюу "SLIM" станцыг буулгасан байдаг. Улмаар дэлхийн түүхэнд саран дээр судалгааны техник буулгаж чадсан тав дахь орон болжээ. Гэвч өнгөрсөн Даваа гаригт /2024.08.26/ "JAXA" сарны судалгаагаа зогсоож буйгаа зарласан байна.

Тодруулбал, "SLIM" станц саран дээр газардах үеэрээ буруу байрлал авсан бөгөөд нарны эрчим хүч цуглуулагч хавтан нь төлөвлөж байсан өнцгөө олоогүй. Энэ нь тооцооллын дагуу бүрэн хүчин чадлаараа ажиллах боломжгүй болсон гэсэн үг юм. "SLIM"-ын хувьд хүйтэн нөхцөлд ажиллахаар зохион бүтээгдээгүй байсан тул нарны эрчим хүчийг цуглуулж, судалгааны мэдээлэл дамжуулах ёстой байжээ.

Сарны гадаргын температур -133 хэм хүртэл буурдаг бөгөөд хоёр долоо хоногийн турш үргэлжлэх тохиолдол бий. "SLIM" станц сарны гурван шөнийг давж чадсаныхаа дараа дэлхийтэй холбогдох чадваргүй болжээ. Өнгөрсөн долоо хоногт тус станцтай холбогдох сүүлийн оролдлого хийсэн ч бүтэлгүйтсэн тул үйл ажиллагааг зогсоохоос өөр аргагүйд хүрсэн аж.

"JAXA" мэдэгдэлдээ “Бид SLIM станцтай дахин холбоо тогтоох боломжгүй болсон гэж үзэж, наймдугаар сарын 23-ны 22:40 цагт үйл ажиллагааг нь зогсоох командыг илгээлээ. SLIM нь өөрийн төлөв байдал болон хүрээлэн буй орчны талаарх мэдээллийг төсөөлж байснаас хамаагүй урт хугацаанд дамжуулсаар байсан юм. Хэн ч үйл ажиллагаагаа ийм урт хугацаанд явуулж чадна гэж бодоогүй" гэжээ. "SLIM" нь сарны хөрсний дотоод царцдасны давхаргыг судлах зорилготой байжээ.

Эх сурвалж: JAPAN TODAY