АНУ-ын ерөнхийлөгчийн сонгуульд өрсөлдөж буй Дональд Трамп, Камала Харрис нар есдүгээр сарын 10-нд анхны мэтгэлцээнээ хийхээр товлосон. Гэвч микрофоны дүрэм болон нэвтрүүлэгчийн шударга байдалд эргэлзэж буй учир мэтгэлцээнийг алгасч магадгүй гэж Трамп мэдэгдлээ. Пенсильвани мужид болох мэтгэлцээнийг "ABC News" суваг ивээн тэтгэхээр болсон.

Мэтгэлцээний үеэр нэр дэвшигч үг хэлэх үед нөгөө нэр дэвшигчийнх нь микрофоны дууг хаах эсэх талаар өрсөлдөгч талууд санал зөрөлдөж байгаа аж. Харрисын багийнхан мэтгэлцээний туршид хоёр нэр дэвшигчийн микрофоныг хаахгүй байхыг хүсч буй. Үүнийг "Politico" цахим хуудас "Трампийн тайван байдлыг алдагдуулж, увайгүй зүйл яриулах зорилготой үйлдэл" гэж тодорхойлжээ.

Трамп Даваа гаригт сэтгүүлчдэд мэдэгдэл хийхдээ "Микрофоны дууг хаах тохиролцоонд хүрсэн байсан. Харрис мэтгэлцмээргүй байгаа учраас нөгөө тал дүрмийг өөрчлөхийг хүсч байна" гэжээ. Цаашилбал, тэрбээр мэтгэлцээнийг өөрийн телевизийн сүлжээгээр зохион байгуулахыг уриалсан байна.

Эх сурвалж: NHK