Тээврийн цагдаагийн албанаас татвар төлж, оношилгоонд ороогүй тээврийн хэрэгслийг өнөөдөр /2024.08.27/-өөс замын хөдөлгөөнд оролцуулахгүйг мэдээллээ. 

Тээврийн цагдаагийн албаны урьдчилан сэргийлэх хэлтсийн мэргэжилтэн цагдаагийн хошууч Г.ОТГОНТАМИР:

-2024 оны долдугаар сарын байдлаар үзлэг оношилгоонд ороогүй 129 мянган тээврийн хэрэгсэл байна. Эдгээрээс Улаанбаатарын дугаартай 81961, орон нутгийн дугаартай 47968 тээврийн хэрэгсэл байна. Монгол Улсын Замын хөдөлгөөний дүрмийн 3.7-д жолоочийн үүрэгт хориглох заалт бий. Үүнд үзлэг оношилгоонд хамрагдаагүй болон тэнцээгүй тээврийн хэрэгслийг унаж замын хөдөлгөөнд оролцохгүй гэж заасан байдаг. Мөн Замын хөдөлгөөний дүрмийн 2.27В дэх заалтад хуулийн этгээдийн үүрэг байдаг. Энэ хэсэгт мөн байгууллага, аж ахуй нэгж өөрийн нэр дээр бүртгэлтэй тээврийн хэрэгслээ тогтоосон хугацаанд нь үзлэг оношилгоонд нь хамруулаагүй, үзлэг оношилгоонд тэнцээгүй тохиолдолд замын хөдөлгөөнд оролцуулахгүй гэж заасан байдаг.

Тэгэхээр иргэд Авто тээврийн үндэсний төв буюу үзлэг оношилгооны тав дээр албан ёсны оношилгоонд нь хамруулж, техникийн бүрэн бүтэн байдлыг хангасны дараа хөдөлгөөнд оролцохыг зөвлөж байна.

Хичээлийн шинэ жил эхлэх гэж байгаатай холбоотойгоор замын хөдөлгөөний ачаалал нэмэгдсэн энэ үед жолооч нар өөрсдөө хариуцлагатай байж, үзлэг оношилгоонд ороогүй татвараа төлөөгүй бол хөдөлгөөнд оролцохгүй байхыг зөвлөж байна. Замын хөдөлгөөний удирдлагын төв болон алба хаагчид зохицуулалтын хажуугаар жолооч нарт давхар хяналт тавьж ажиллаж байгаа. Тиймээс бүрэн бус техниктэй хөдөлгөөнд оролцохгүй байх шаардлагатай.