Япон улс хүнсний хэрэглээнийхээ гуравны хоёрыг, малын тэжээлийн дөрөвний гурвыг импортоор авдаг. Үүний зэрэгцээ жил бүр 28.4 сая тонн хүнсний бүтээгдэхүүн хаядаг аж. Үүний ихэнх нь идэж болох хүнсний бүтээгдэхүүн байдаг. Энэ нь мэдээж байгаль орчин, эдийн засгийн асар их зардалтай. Тухайлбал, Япон улс жил бүр хог шатаах ажилд 800 тэрбум иен буюу 5.4 тэрбум ам.доллар зарцуулдаг. Нийт шатаасан хог хаягдлын 40 орчим хувь нь хүнсний бүтээгдэхүүн байдаг.

Хүлэмжийн хийн ялгаруулалтаараа дэлхийд тавдугаарт ордог Япон улс 2030 он гэхэд ялгаруулалтыг 46 хувиар бууруулж, 2050 он гэхэд нүүрстөрөгчийн хийг бүрэн саармагжуулах зорилт тавьсан. Хүнсний хог хаягдлын асуудлаа шийдэх нь энэ хүчин чармайлтын нэг хэсэг юм.

Тэгвэл малын эмчээр ажиллаж байсан Такахаши эртний шинжлэх ухааныг шинэ шийдэл болгон дэвшүүлжээ. Тэрбээр исгэх технологийг ашиглан хүнсний хог хаягдлыг дахин боловсруулахаар ажиллаж байна. Японы засгийн газар 19 дүгээр зуунд шар айраг исгэх, шар буурцагны соус хийх зэрэг эртний арга технологид суурилсан шинэ үйлдвэрүүдийг байгуулахад ихээхэн хөрөнгө зарцуулсан. Үүнээс хойш исгэлтийн технологи нь Японд шинжлэх ухааны судалгааны сэдэв байсаар ирсэн.

Канагава мужийн Сагамихара хотод байрладаг Такахашигийн дахин боловсруулах үйлдвэр өдөрт 40 орчим тонн хүнсний хог хаягдлыг дахин боловсруулдаг. Дахин боловсруулалтын үр дүнд бий болсон эко тэжээл нь фермд ашигладаг ердийн тэжээлээс хоёр дахин хямд. Эко тэжээлээр өсгөсөн гахайн махны чанар илүү сайн байгааг фермер Дан Каваками хэлжээ.

Такахашигийн гол зорилго нь нийгмийн сайн сайхны төлөө учраас шинэ технологидоо патент аваагүй бөгөөд түүний аргыг хуулбарлах боломжийг нээлттэй орхижээ.

Эх сурвалж: BBC