Ажлын бус цагаар холбоо харилцаагүй байх буюу утсаа авахгүй, цахим шууданд хариулахгүй байх эрхийг Австралид хуулиар зохицуулжээ. Хууль өнөөдрөөс эхлэн хүчин төгөлдөр хэрэгжиж байгаа аж. Covid-19 цар тахлын үеэр дэлхий даяар компаниуд зайнаас ажиллах зохицуулалтыг хийсэн. Үүнээс хойш ажил, гэр хоорондын ялгаа бүдгэрч, ажлын бус цагаар дуудлага ирэх зэрэг хандлага улам нэмэгджээ.

Свинберн технологийн их сургуулийн дэд профессор Жон Хопкинс ажил, амьдрал ийн холилдох болсныг цахим технологитой холбон тайлбарлаж байна. "Дижитал технологи бий болохоос өмнө ийм зүйл байгаагүй. Хүмүүс ээлжийн ажлаа дуусгаад л гэртээ харьдаг, дараагийн өдөр нь ажилдаа иртэл холбоо харилцаагүй байдаг байсан. Одоо дэлхийн хэмжээнд ажлын бус, амралтын цагаар цахим шуудан, зурвас, дуудлагад хариулах нь ердийн жишиг болжээ" гэж тэр хэлсэн байна.

Гэхдээ ажилтнууд зөвхөн үндэслэлтэй тохиолдолд хариу өгөхөөс татгалзах боломжтой. Үндэслэлтэй эсэхийг нь Австралийн Шударга ажлын комисс шийдэх юм байна. Ингэхдээ тухайн ажилтны үүрэг, хувийн нөхцөл байдал, ямар учраас холбоо барьсан зэрэг шалтгааныг харгалзан үзнэ.

Хуулийг батлахдаа практик үр нөлөөг нь харгалзан үзээгүй, ажил олгогчдод бэлтгэх хугацаа олгоогүй гэж Австралийн ажил олгогчдын бүлэг шүүмжилж байна. Мөн ажлын байр уян хатан бус болж, улмаар эдийн засаг удаашрах сөрөг үр дагавартай гэж үзэж байна.

2023 онд австраличууд дунджаар 281 цаг цалингүй илүү цагаар ажилласан болохыг өнгөрсөн онд хийсэн судалгаагаар тогтоожээ. Тэдний хөдөлмөрийг үнэлбэл 130 тэрбум австрали доллар буюу 88 тэрбум ам.доллар болох аж.

Австралийн энэ хууль өмнө нь Европ, Латин Америкийн 20 гаруй оронд хэрэгждэг байжээ. Тухайлбал, Францын "Pioneer" компани 2017 онд ажлын бус цагаар холбогдохгүй байх дүрмийг нэвтрүүлсэн. Үүнээс нэг жилийн дараа хортон шавьжтай тэмцэх "Rentokil Initial" компани утсаа үргэлж асаалттай байлгахыг ажилтнаасаа шаардсанаар 60 мянган еврогоор торгуулсан байна.

Эх сурвалж: JAPAN TODAY