Удтал хүлээлт үүсгэсэн Урт цагааныг авто зогсоолтой, цэцэрлэгт хүрээлэн байгуулах ажил яригдаад багагүй хугацаа өнгөрсөн ч бүтээн байгуулалтын ажил хэзээ эхлэх нь тодорхойгүй зуныг үдсэн.  Чингэлтэй дүүргийн гуравдугаар хороонд байрлах нийслэлийн өмчийн гуравдугаар байр буюу “Урт цагаан” худалдаа, үйлчилгээний төвийн барилгыг өнгөрсөн оны арваннэгдүгээр сард нураах шийдвэр гарсан. Улмаар иргэдээс санал авч, санал асуулгад оролцсон иргэдийн 96 хувь нь далд зогсоол бүхий цэцэрлэгт хүрээлэн байгуулахыг дэмжсэн. Тэгвэл урт цагааны суурин дээр баригдах далд авто зогсоолын ажлыг түр хугацаагаар хойшлуулж, цэцэрлэгт хүрээлэнгийн барилгын ажлыг эхлүүлжээ. Тодруулбал, НЗДТГ-аас  Урт цагаан худалдаа үйлчилгээний төвийн буулгасан талбайд далд зогсоол бүхий цэцэрлэгт хүрээлэн байгуулах ажлыг эхлүүлсэн гэж мэдээллээ. Энэ ондоо далд зогсоолын ажлыг хийх бөгөөд ирэх хавар цэцэрлэгт хүрээлэнгийн бүтээн байгуулалтыг эхлүүлэх юм байна.

Монголд бүтээн байгуулалтын улирал богинохон. Гэтэл Урт цагааны суурин дээр ямар нэг бүтээн байгуулалтын ажил эхэлсэн дүр зураггүй, автомашины төлбөртэй зогсоол ажилласаар зуныг үдсэн.

"ЭНЭ ЖИЛ ГАЗАР ДООРХ ГАРААШНЫ БАРИЛГЫГ БҮРЭН ДУУСГАЖ, ИРЭХ ХАВАР ТОХИЖИЛТЫН АЖИЛ ХИЙГДЭНЭ"

НЗД-ын Нийгмийн салбар, ногоон хөгжил болон агаар орчны бохирдол хариуцсан орлогч Л.Хосбаяр "Энэ жил бид уг бүтээн байгуулалтыг бүтэн дуусгана гэж зорьж, төсөвт тусгасан боловч Худалдан авах ажиллагааны хууль, процесс удаан учир барилгын ажлыг одоо эхлүүлж байна" гэсэн юм. Мөн нийслэлийн Хөрөнгө оруулалтын газрын дарга С.Цэдэнсодном "Урт цагааны барилгыг буулгасан буурин дээр далд гарааштай ногоон байгууламж бүхий цэцэрлэгт хүрээлэнгийн барилга угсралтын ажил эхэлж байна. Энэ жилдээ газар доорх гараашны барилгыг бүрэн дуусгаж, ирэх хавар тохижилтын ажил хийгдэнэ. Хотын А зэрэглэлийн нягтаршил ихтэй бүсэд бүтээн байгуулалтын ажил хийгдэж буй тул богино хугацаанд замын хөдөлгөөн болон иргэдэд саад учруулахгүйгээр аюулгүй байдлыг хангаж, төслийг дуусгахаар төлөвлөж байна" гэж мэдээллээ.

БАРИЛГЫН БҮТЭЭН БАЙГУУЛАЛТЫГ "БОДЬ ПРОПЕРТИЙЗ" ХХК ГҮЙЦЭТГЭХЭЭР АЖЛАА ЭХЭЛЖЭЭ

Нийслэлийн өмчийн III дугаар байр буюу “Урт цагаан” үйлчилгээний төвийн барилгыг дахин төлөвлөх концепц, загвар зураг төсөл боловсруулах уралдааны эхний шалгаруулалтын дүнг 2020 онд танилцуулж байв. Нийт 30 сая төгрөгийн шагналын сантай тус уралдаанд  зураг төслийн мэргэжлийн байгууллага, хувь уран бүтээлчид, оюутан, залуус, олон нийтийн болон ТББ-ууд, ОХУ, Швед, Нидерланд, БНХАУ зэрэг улсаас нийт 28 бүтээл ирсэн байдаг. Нийт 55823 иргэн санал өгснөөс “MGL E&C” дизайнерс баг хамт олон тэргүүлж өргөмжлөл , 20 сая төгрөгийн батламжыг гардан авлаа. Хоёрдугаар байранд  “Монгол Архитектур” ХХК-ний бүтээл, гуравт “Маза Эм эй Зэйт Эй”-ийн бүтээл шалгарч өргөмжлөл, таван сая төгрөгөөр тус тус шагнуулж байв.

Уг бүтээн байгуулалтын зураг төслийн ажлын тендер гуравдугаар сард зарлагдсан. Харин гүйцэтгэгч компанитай өнгөрсөн баасан гаригт буюу наймдугаар сарын 23-нд гэрээ байгуулжээ.

Гүйцэтгэгч компаниар сонгогдсон "Бодь пропертийз" ХХК шалгарчээ. "Бодь пропертийз" ХХК нь "Бодь групп"-ийн охин компани. "Бодь групп" нь олон салбарт үйл ажиллагаа явуулдаг бөгөөд олон нийт "Голомт" банкны эзэн Г.Баясгалангийн эзэмшлийн гэдгээр нь илүү сайн мэддэг билээ. "Бодь пропертийз" ХХК хамгийн сүүлд Тавантолгой-Гашуунсухайт чиглэлийн төмөр замын барилга байгууламжийн ажлыг хийж гүйцэтгэсэн байна. УИХ-ын гишүүн Х.Баттулга Ерөнхийлөгч байхдаа уг төмөр замын төслийг төрийн нууцад авч, тендергүйгээр Д.Баясгаланд өгсөн баримт нь дэлгэгдсэн.

Эргэн сануулахад, Урт цагааны барилга нь 1958-1961 онд ашиглалтад орсон бөгөөд баригдсанаас хойш засвар, шинэчлэл хийгээгүйгээс нурах эрсдэлтэй болж, мэргэжлийн хяналтын байгууллагаас иргэдийг бэртэж гэмтэхээс сэргийлэн удаа дараа нэн даруй нураах шаардлагатай гэсэн дүгнэлтийг гаргасан байдаг. Харин судлаачдын зүгээс энэ барилгыг нураалгүйгээр дахин сэргээн засварлах бүрэн боломжтой гэдэг байр суурийг илэрхийлж байв.