Орос, Украины талууд өнгөрсөн Бямба гаригт /2024.08.24/ тус бүр 115 олзны цэрэг буюу нийт 230 хүнийг Арабын Нэгдсэн Эмират улсын зуучлалаар солилцсон байна. Энэ нь өнгөрсөн наймдугаар сарын 6-нд Оросын Курск мужид Украин довтлон орсноос хойш болж буй хамгийн том хоригдол солилцох үйл явдал болсон. Түүнчлэн Украины тусгаар тогтнолын 33 жилийн ойтой давхцав.

Оросын Батлан хамгаалах яамны мэдээлснээр, Курск мужид болсон тулалдааны үеэр олзлогдсон цэргүүдээ буцаан авсан. Эдгээр цэргүүд одоогийн байдлаар Беларусьт байгаа ба эх орондоо буцаж ирснийх нь дараа эмчилгээнд хамруулах юм байна. Украины хувьд 2022 онд Мариуполь хотыг хамгаалах дайны үеэр олзлогдсон 82 цэргээ буцаан авсан гэж тус улсын хүний эрхийн хорооны дарга Дмитро Лубинец онцоллоо. Ерөнхийлөгч Зеленский солилцооны үеэр Курскийн ажиллагаанд оролцсон болон эх орондоо буцаж ирсэн цэргүүдэд талархал илэрхийлж, хүндэтгэлийн арга хэмжээ зохион байгуулжээ.

Энэ нь тус улсыг Европын Холбоонд нэгдэхэд чиглэсэн нэг алхам болж байгаа юм. Арабын Нэгдсэн Эмират улсын хувьд Украины дайн эхэлснээс хойш 1,788 олзны цэргийг эх оронд нь буцаахын тулд зуучлагч хийсэн гэдгээ онцлон тэмдэглэв. Тус улсын Гадаад хэргийн яамны мэдээлснээр, өчигдөр болсон зуучлалын арга хэмжээ нь Орос, Украины хооронд зуучилсан долоо дахь удаагийн солилцоо юм. Ингэснээр тус улс ямар ч талуудын дунд төвийг сахиж, олон улсын хэмжээний хамтын ажиллагаа, аюулгүй байдлыг дэмжигч, зуучлагч орон болсноо дэлхий нийтэд таниулаад байна.