Баруун Германы Солинген хотод Баасан гаригийн орой фестивалийн үеэр хутгатай этгээд халдлага үйлджээ. Аж үйлдвэрийн хот Солинген байгуулагдсаны 650 жилийн ойг ард иргэд тэмдэглэж байжээ. Гангийн үйлдвэрлэлээрээ алдартай Солинген хот нь 160 мянга орчим оршин суугчтай.

Халдлагын улмаас гурван хүн амиа алдаж, дөрвөн хүн хүнд шархдав.

Халдлага үйлдэгчийг одоо хүртэл баривчлаагүй байгаа аж. "Bild" цахим хуудсанд бичсэнээр нэгэн эр хажуугаар өнгөрөх хүмүүсийг гэнэтхэн хутгалжээ. Одоогоор цагдаагийн нисдэг тэрэгнүүд хотын дээгүүр нисч, гэмт хэрэгтнийг хайж байна. Мөн сэжигтнийг эрэн сурвалжлах ажилд зориулж 40 тактикийн машин байрлуулжээ. Замууд хаагдсан, эрэн сурвалжлах ажил үргэлжилж байгаа тул иргэдийг гэрээсээ гарахгүй байхыг сануулж байна.

Хотын иргэд ойгоо тэмдэглэхээр баяр жаргалтай цугларсан ч нас барагсдад эмгэнэл илэрхийлэх ёстой болсон тул маш гунигтай цочирдсон байдалтай байгааг хотын дарга Тим Курцбах хэлжээ. Баяр гурван өдөр үргэлжлэх ёстой байсан бөгөөд орой бүр 25 мянга орчим хүн цуглах төлөвтэй байсан.

Эх сурвалж: BBC