Энэтхэгийн ерөнхий сайд Нарендра Моди Баасан гаригт Украинд айлчилсан. Тэрбээр Украины ерөнхийлөгч Зеленскийд хандан дайныг зогсоохын тулд ОХУ-тай хэлэлцээ хийхийг уриалав. Мөн энх тайвныг тогтооход найз нөхрийн хувиар оролцохоо илэрхийлжээ. Тэрбээр өнгөрсөн сард Москвад мөн айлчилж, энх тайвныг уриалсан билээ.

Моди хэлэхдээ "Шийдвэрийг зөвхөн яриа хэлэлцээ, дипломат арга замаар л гаргах боломжтой. Бид цаг хугацаа алдахгүйгээр үүнийг хийх ёстой. Хоёр тал хямралаас гарах гарцыг хамтдаа хайх ёстой. Энэтхэг улс энх тайвны төлөөх аливаа хүчин чармайлтад идэвхтэй үүрэг гүйцэтгэхэд бэлэн гэдгийг би хэлэхийг хүсч байна. Хэрэв би хувьдаа ямар нэг үүрэг гүйцэтгэж чадахаар бол хийх болно" гэжээ.

Айлчлал дууссаны дараа Зеленский ард түмэндээ хандаж хэлсэн үгэндээ "Энэтхэг улс олон улсын хууль тогтоомжийг тууштай баримталж, манай бүрэн эрх, нутаг дэвсгэрийн бүрэн бүтэн байдлыг дэмжиж байгаа нь бидний хувьд чухал" гэжээ.

Украины тал дайныг Оросын бус өөрсдийн нөхцөлөөр дуусгахыг хүсч буйгаа удаа дараалан мэдэгдсэн. Энх тайвныг тогтоохын тулд Оросын төлөөлөгчдийн оролцоотой хоёр дахь дээд хэмжээний уулзалтыг энэ оны сүүлээр зохион байгуулахыг Украин хичээж байна. Швейцарьт зургадугаар сард болсон дээд хэмжээний уулзалтад ОХУ оролцоогүй. Энэтхэгийн төлөөлөгчид оролцсон ч дэлхийн хоёр дахь том эдийн засагтай Хятадаас хүн ирээгүй билээ.

Эх сурвалж: REUTERS