Талибаны удирдагчид иргэдийн өдөр тутмын амьдралын хэв маягт нөлөөлөх шинэ хуулийг саяхан баталжээ. Шинэ хуулийн 13 дугаар зүйл нь эмэгтэйчүүдтэй холбоотой.

Эмэгтэйчүүд олон нийтийн газар бие болон нүүрээ халхалж явна. Нимгэн, бариу, богино хувцас өмсч болохгүй. Исламын шашинтай бус эрчүүдийн өмнө биеэ халхлана. Эмэгтэй хүний дуу хоолой дотно зөөлөн байдаг тул олон нийтийн газар дуулах, юм унших зэрэг хориотой. Цусан төрлийн холбоотой болон гэрлэсэн эр хүнээ л харж болно, бусад хүн рүү харах хориотой. Мөн тээврийн хэрэгслээр ганцаараа яваа эмэгтэйчүүдийг тээвэрлэх, өөр хоорондоо хамааралгүй эр эм хүмүүсийг холих хориотой.

Шинэ хуулийн талаар холбогдох яамны хэвлэлийн төлөөлөгч хэлэхдээ "Энэхүү исламын хууль нь ариун журмыг сурталчилж, бузар мууг арилгахад маш их тус болно гэдгийг бид баталж байна" гэжээ.

Талибанчууд 2021 онд засгийн эрхийг гартаа авсныхаа дараа Ёс суртахуунгүй байдлаас урьдчилан сэргийлэх, ариун журмыг түгээх яамыг байгуулсан. Тус яам анх удаа албан ёсны тунхаглал гаргаж буй нь энэ ажээ.

Эх сурвалж: CNN