Тайландын нийслэл Бангкокоос зүүн Трат мужийг чиглэн нисч явсан чартер нислэгийн онгоц Пүрэв гаригт осолджээ. "Cessna Caravan C208B" онгоц Бангкокоос зүүн урагш 100 км зайд ой модтой, шаварлаг газарт унасан байна. Онгоцонд Хятадаас ирсэн таван жуулчин, дөрвөн тайланд, хоёр нисгэгч гээд нийт 11 хүн байжээ. Тэгвэл аврагчид ослын бүсэд ажилласны эцэст бүх зорчигчийг нас барсан болохыг мэдээллээ.

Онгоц шаварлаг газар унасан тул эрлийн ажиллагааг явуулахад хүндрэлтэй байгаа аж. Зарим газарт доошоо 10 метр хүртэл ухах шаардлагатай болж байгааг ослын голомт болсон Чачоенсао мужийн захирагч Чонлатеэ Ёнгтронг хэлэв.

Онгоц Пүрэв гаригийн үдээс хойш Суварнабхуми нисэх онгоцны буудлаас хөөрөөд 11 минутын дараа газрын удирдлагатай холбоо тасарсан байна. Нутгийн иргэний хэлснээр онгоц хараахан унаагүй агаарт байх үед хүчтэй дэлбэрэх чимээ сонсогджээ.

Эх сурвалж: REUTERS