Хичээлийн шинэ жил эхлэхтэй зэрэгцээд сурагч, хүүхдүүд хамрагдах боломжтой дугуйлан хөтөлбөрүүдийн эрэлт өсдөг. Нийслэлийн хэмжээнд энэ намар элсэлтээ авах хүүхдийн дугуйлан, хөтөлбөрүүдийн талаар мэдээллийг хүргэж байна.

МОНГОЛЫН ХҮҮХДИЙН ОРДОН 2 ЭЭЛЖЭЭР ХИЧЭЭЛЛЭНЭ

Монголын хүүхдийн ордонд нийтдээ 26 төрлийн дугуйлан хичээллэнэ. Ямар дугуйлан гэдгээсээ шалтгаалаад анги дүүргэлт янз бүр байдаг байна. Жишээ нь хөгжмийн дугуйлангууд ганцаарчилсан байдлаар хичээллэдэг. Ерөнхий боловсролын сургуулийн 3-12 дугаар ангийн сурагчид дугуйланд хамрагдах боломжтой бөгөөд өглөө 08:30-11:30, өдөр 14:00-17:00 гэсэн хоёр ээлжтэй.

Намрын элсэлтийн бүртгэл есдүгээр сарын эхээр эхлэх бөгөөд тодорхой хугацааг багш нар цугласны дараагаар цахим хуудсаараа дамжуулан зарлах юм байна.

Жилийн төлбөр 380 мянгаас 1.2 сая төгрөгийн үнэтэй.

Монголын хүүхдийн ордон гурван жилийн хөтөлбөртэй бөгөөд энэ хугацаанд идэвх зүтгэлтэй суралцсан хүүхдүүдэд төгсөгчийн үнэмлэх олгодог байна.

ИД ШИДИЙН ОРОН: НАМРЫН ЭЛСЭЛТ ЕСДҮГЭЭР САРЫН 1-НД ЭХЭЛНЭ

Ид шидийн оронд жюү жицү, бүжгийн спорт, уран зураг, чимэглэх урлаг, төгөлдөр хуур, англи хэл гэсэн зургаан төрлийн сургалт явуулдаг. Намрын дугуйлангийн элсэлт есдүгээр сарын 1-нд эхэлнэ. Бүжгийн спорт болон, жюү жицүгийн дугуйланд жилд нэг удаа элсэлт авдаг. Бусад сургалтын хувьд гурван сарын хугацаатай төгсгөөд, шинэ элсэлтээ аваад явдаг байна. Ид шидийн орны бүх салбар, байршлуудад эдгээр сургалт хичээллэдэг.

Мөн эдгээр салбарууд гэр хороололд байдаг гэдгээрээ давуу талтай бөгөөд, хүүхдийг бүрэн дүүрэн авьяастай болгоно гэхээс илүүтэйгээр анхан шатны мэдлэг олгох, цаашдаа эцэг эхчүүд, хүүхдүүд өөрсдөө бие даан хөгжүүлж болох мэдлэгийг олгохыг зорьдог байна.

ХҮҮХДИЙН УРЛАН БҮТЭЭХ ТӨВ: ЕСДҮГЭЭР САРЫН 15-НААС ХИЧЭЭЛЛЭНЭ 

Хүүхдийн урлан бүтээх төв нь  хүүхдийн хичээлээс гадуурх сургалт, хүмүүжил, хөгжлийн үйл ажиллагаа явуулдаг байгууллага учраас ерөнхий боловсролын сургуультай зэрэгцэж үйл ажиллагаагаа явуулдаг. 2023-2024 оны хичээлийн жилд 18 төрлийн 21 дугуйлан хичээллэсэн бөгөөд нийт 1500 гаруй хүүхэд суралцаж төгссөн байна.

 2024-2025 оны элсэлтээ есдүгээр сарын 3-наас эхлэн бүртгэж, есдүгээр сарын 15-наас эхлэн хичээллэнэ.

Энэ хичээлийн жил 18 төрлийн 28 дугуйлан хичээллэнэ. Нэмэлтээр монгол хувцас загварын анги нээхээр зорьж байгаа юм байна. Хүүхдийн урлан бүтээх төвийн хувьд дүрслэх урлаг, гар урлалын чиглэлээр хүүхдүүд маш их суралцдаг. Тиймээс хүүхдүүдийнхээ эрэлт, хүсэлтийн дагуу эко урлалын анги, сүүлийн үеийн уран зургийн бүх төрлөөр, уран зургийн ангиуд төрөлжиж байгаа аж. Түүнчлэн уран баримал, уран бичлэг гэх мэт урлахуйн чиглэлээр түлхүү сургадаг гэв.