Хамгийн сүүлд гарсан онигоо:

-Ёс зүйтэй иргэнийг төлөвшүүлнэ. /Засгийн газрын үйл ажиллагааны мөрийн хөтөлбөрөөс/

Ичих нүүр гэж алга аа. Ичихгүйн дээр иргэдэд тэрийгээ итгүүлэх гээд баларч байна. Ичсэн хүн хүн алав гэгчээр өөрийн толгой дээрх тэмээг харалгүй хүний толгой дээрх өвсийг харав болов. Сав хийвэл утсаа бариад уйлж, дуулж явдаг шинэ гишүүний бараа, бүтээгдэхүүн сурталчилсанд ёс зүйн хариуцлага тооцох шийдвэр УИХ-ын байнгын хороо гаргажээ. Саваад уначих шахав. Хоёр нүүртэй, ичгүүр сонжуургүй амьтад ийм зүйлийн тухай ярихаар хөх инээд ч хүрэх шиг. Хаана байна аа, тэр ёс зүй чинь.

Сонгуулийн өмнөхөн л Монголын хамгийн том “солгой” нам төсвийн зардлыг хэрхэн багасгах тухай мөрийн хөтөлбөртөө тусгаад бид ч “Засарсан янхан заяаны хань” ухааны юм дэмий донгосёоор дахин сонгоцгоосон. Гэтэл яав. Тэгээд юу болов?! Дахиад л сумдад улаан булангаа барихын тулд төсвийн тодотгол хийж байна. Үе “мултарсан” Сангийн сайд өнөөх “Z” үеийн төлөөлөлд “Улаан булан хэрэгтэй” гэж ухуулах гээд барсангүй. Ичмээр ч юм шиг. Намбар гуайн хүү ид гялалзаж явахад асуулт болгоныг үг бүрчлэн давтаж хэлээд ганцхан үгээр хариулт өгдөг байсан дарга шиг эдийн засгийн үр өгөөжгүйн дээр онолын хувьд уналтад оруулах төсвийн тодотголоо гишүүдийг “Та буруу ойлгоод байна аа” гэж байгаад будилуулах гэсэн Сангийн сайд өөрөө өнөөгийн төсвийн алдагдал, эдийн засгийн уналтын шалтгаан гэдгийг энэ хэдэн өдрүүдэд монголчууд ойлгов. Тэр татвар бууруулахгүй гэдгээ хэнд ч ойлгомжтойгоор хэлчихлээ. Харин барууны үзэл баримтлалтайгаа гайхаж, чөлөөт зах зээл ярьж явсан Т.Доржхандтан ирэх өвөл эрчим хүчний үнийг чөлөөлөх бус нэмэхээс өөр аргагүй тухай зарлаж, социалзимын он жилүүд шиг өөрсдөдөө ч байхгүй эрчим хүчийг экспортод гаргадаг улс болох тухай ярьж явна.

“Ногоон автобус”, “Нүүрсний хулгай”, Хөгжлийн банк мөнгө гээд эрх баригчдын идсэн уусантай хариуцлага тооцох тухай музей гаргаж явсан тэр хайрын тэврэлтэд нь хамаг бүхнээ мартчихсан тууж явна.

Үе залгамжилсан хаан гэдэг шиг сонгуульд залгамжилсан Ерөнхий сайд Л.Оюун-Эрдэнэ ч ялгаа алга. “МАНАН дэглэмтэй тэмцэж байна” гэж мангартуулж ирсэн этгээд өөрөө жинхэнэ МАНАН дэглэмээ, авлигын схемээ бий болгож байна. Халамжаас хөдөлмөрт шилжих нь туйлын чухал гэж хаваржин ярьсан хэр нь залууст байр авч өгөх тухай тэр хэлжээ. Яасан их мөнгөтэй, ямар сайхан сэтгэлтэй есөн шид нь бүрдсэн ЕС вэ?

Гэтэл Монгол ядуу байгаа нь Хятад эсвэл Оростой холбоотой гэж бодогчид ОХУ-ын нийслэл Москва дроны халдлагад өртсөнийг шүүрч аваад сүйд. Монгол зутруу, үнийн өсөлт, цалин хүрэлцээгүй, салалт өндөр, сургууль, цэцэрлэгийн хомсдол байсаар байгаа нь зах зээлд төрийн оролцоо дээд цэгтээ хүрснээс үүдэлтэй болохоос урд, хойд хөршөөс огтхон ч хамаагүй. Нүүдлийн шувууг мөнгө төлж бариулж буй арабуудад бүр падлий ч байхгүйг Оросыг баримтлагчид ойлгохгүй нь тоогүй.

Тийм болохоор топ гэгддэг бизнесүүдийг улам бүр төрөөс угжих тухай, тэгэхдээ бүр тендер ч зарлахаа болих тухай хууль, эрх зүйн орчныг бүрдүүлэхээр гар хөлүүд нь энэ өдрүүдэд идэвхийлэн зүтгэж байна. Юун тэдний хэрүүлийг сонсох манатай, урдах ажлаа урагшлуулахаар зүтгэж явдаг жижиг, дундчууд үүнийг анзаарах ч сөхөөгүй явна.

Амьд үлдэхийн тулд АН, МАН, сүүлд ХҮН намд мөнгө хувааж өгдөг болсон бизнесийнхэн өөрсдийг нь үгүй хийх гэж байхад "Гурвуулангийнх нь сонгуульд мөнгө өгсөн учраас гайгүй байгаа" гэсэн шүү юм бодоод чимээгүй ажиглацгааж байна. "Хожиж байна" гээд хожигдож суудаг хоёр нүүртнүүд.

Хоёр нүүртэй, ялзарсан ардчилагчид "данхар төрийн эсрэг тэмцэнэ" гэж сонгогчдоос чамлахааргүй санал авчаад хүчтэй сөрөг хүчин бус төрийг данхайлгах системийн нэг эд анги нь болоод суув. Дэлхий эргэдгээрээ эргэж, хүний нөлөөгүйгээр хувьсан өөрчлөгддөг байхад түүнийг нь өөрчлөх тухай Байгаль орчин, уур амьсгалын өөрчлөлтийн сайд болж буй хүнд зудын гамшиг албан тушаалаа хадгалж үлдэх ашигтай үйл явц болно уу гэхээс амьдралд тустай зүйл авчрахгүй.

…Тийм байхад хүүхдийн памперс тарааж байгаад учиргүй уйлан ярицлага өгч буй ээмэгтэнг хоёр нүүртэн, оочерлож буйг нь ичих нүүргүй, огт хамаагүй эрчүүдийг арчаагүйгээр нь дуудаад ч яах билээ.

Бид өнөөдөр улстөрчдийг, төрийн үйл ажиллагааг шүүмжилж, өвөлдөө хүүхдээ тэврэн эмнэлгийн хонгилын шалаар нэг зулж, сурч боловсрох сургууль, цэцэрлэгийнх нь оронд сумын төвд улаан булан барина гэж байхад тоодоггүй, хэдэн зуугаараа угаартаж үхэцгээж байж урин цаг ирэхэд мартдаг адгийн хоёр нүүртнүүд.

Байгаа байдлаа төр засгийн буруу гэсэн хэр нь тэднийгээ байнга өөрсдөө сонгодог өрөвдөлтэй амьтас хойно, одоо яалтай…

Ийм болохоор ирээдүйн ёс зүйтэй иргэнийг бий болгоно гэж ичгүүр сонжуургүйгээр гэр бүл рүү чинь дайрч, өөрсдийг нь шүүмжилдэггүй, өөрийн гэсэн бодолгүй хүн болгохоор үр хүүхэд рүү чинь улстөрчид довтолж байна. Хүүхдийн чинь ёс зүйн доголдлыг хэн тодорхойлно вэ? Тэдний хүүхдүүд үү эсвэл аав, ээж нь үү?